Aruba bon cubri durante seminario na Den Haag

0

DEN HAAG – E nomber di Aruba a resona varios biaha durante e seminario “Opportunities in Latin America” cu recientemente a tuma luga na Den Haag. E seminario aki a wordo organisa pa Rijksdienst voor Ondernemend Nederland (RVO) en cooperacion cu European and Latin American Technology based Business Network (ELAN) network, TNO, MVO (Maatschappelijk Verantwoord Ondernemen) y). Invitado special tabata Minister Plenipotenciario di Aruba Juan David Yrausquin.

E parti oficial di e programa a conta cu algun discurso, entre otro di Kees Willemse di TNO. Den su presentacion sr. Willemse a papia riba e experiencia positivo cu TNO tin di nan presencia na Aruba pa cu nan contactonan cu paisnan den Caribe y Latino America. El a ilustra e importancia di e Green Gateway y e oportunidadnan cu esaki ta brinda na inversionistanan Europeo via di Aruba.

Tambe durante e di dos parti di e seminario e nomber di Aruba a cay den relacion cu e “Smart Community”. Durante di e seccion riba Sostenibilidad e proyecto aki a bin dilanti como un experencia unico, sostenibel y innovativo cu ta un ehempel pa mundo.
E departamento di Economische Acquisitie di Arubahuis tabata presente cu un stand cu informacion riba e oportunidad di Aruba como Gateway entre Europa y Latino America.

E seminario cu a conta cu presencia di funcionario di diferente embahadanan di paisnan Latino Americano y companianan cu interes den haci negoshi na e continente aki a tuma nota di e vision di Aruba riba tereno di sostenibilidad.