Diabierna, 15 di Juni pa 8 or y 30 di mainta, Aruba Birdlife Conservation lo ta bayendo corte un biaha mas, pa di dies biaha (si, e di 10), haciendo tur lo posibel pa e area entre The Mill y ex House of Cheng wordo protegi.
E propiedad aki ta un area protehi segun e ROP y e ta un gang entre e dos bandanan di Aruba Bubali Wetlands.
Bubali ta designa pa Birdlife International como un IBA (Important Bird Area) y e ta e hotspot #1 di parhanana di Aruba cu 176 especie di parha registra pa IBA y eBird (proyecto di Cornell University y e National Audubon Society).
ABC tambe ta hopi curioso pa haya sa den corte mañan kico ta e posicion di Land Aruba.
Prensa, representantenan y boluntarionan, tur ta bon bini,
Esaki ta un di e 16 areanan cu gobierno a priminti, mas di un biaha, incluyendo Prinses Beatrix, pa proteha y pone bou di Parke Nacional Arikok. ABC te ainda ta wardando riba gobierno pa actua di acuerdo y pa asina proteha e 16 areanan.
Lamentablemente, te cu awe, nada un pasa.
ABC lo mantene su posicion, den corte si ta necesario, pa proteha e areanan pa no wordo destrui.
Un biaha mas, ABC lo ta bayendo corte pa di 10 biaha.
Nos ta haci esaki pa futuro di nos muchanan.