E ballroom na Piedra Plat Entertainment Center a keda bunita decora na honor di miembronan di staff di e Aruba Beach Club, na ocasion di e resort su celebracion di 40 aniversario, den presencia di e miembronan di hunta di directiva y e ekipo di gerencia.
Ora el a wordo construi, Aruba Beach Club tabata e timeshare #8 na mundo y e prome pafo di un teritorio di Merca. Awendia, e resort ta orguyoso di e hecho cu e tin 85 empleado fiel y 3,000 miembro. E resort ta disfruta di un perfil di huesped multi-generacional, y algun di e huespednan a pasa nan vakantie na e hotel, tur aña, desde nan infancia.
Empleadonan a wordo ricibi na e fiesta pa e vice director di e hunta di directiva, Cindy Martorella, kende a papia na nomber di e miembronan di e hunta di directiva y gerencia. Den su remarkenan, Martorella a bisa: “E ocasion aki no lo ta posibel sin tur boso trabou duro y servicio dedica den transcurso di e añanan. Ta danki na e integridad aki di nos famia di ABC cu nos a yega asina leu, y nos ta mirando dilanti riba hopi aña mas.”
Martorella a sigui pa expresa su aprecio agradecido pa e trabou cu a wordo haci, y pa e tantisimo sonrisa y recuerdonan keri cu e empleadonan a yuda crea cu nan sin fin di actonan di amabilidad pa cu e huespednan.
Despues di esaki el a elogia e amistadnan cu ta existi entre e huesped y empleadonan y e ambiente familiar na e resort, resultando den hopi amistad y alegria den e seno di trabou.
Miembronan di gerencia, cu Gerente General Farida Mansur na mando di e anochi, a sigui cu e reconocemento di gerente di laundry Farida Larosa Fargo pa su 39 aña di servicio sin interupcion, cu un bouquet di flor gigantesco.
Un brindis pa e siguiente 40 aña a conclui e parti oficial di e anochi. E fiesta a sigui cu un buffet excelente di cena y bailamento riba e ritmonan di D’licious band.