E tremendo torneo HEINEKEN femenino fast pitch di Aruba Softball Bond a continua na veld di Dragon Hitters. E fuerte ekipo di Aruba Bank Lady Tigers a enfrenta e muchanan di Waika Maduro di San Nicolas esta e hoben ekipo di Rebels. Den Rebels tin muchanan di edad hopi hoben ta militando entre 14 y 18 aña kendenan porcierto ta ricibiendo un tremendo experiencia compitiendo den e torneo aki. Aruba Bank sinembargo carga cu hungadonan estelar a sa di derota Rebels cu score di 13-2 pa asina mantene nan mes solido na di dos luga faltando un wega crucial cu Jaguars kende ta comandando e table di posicion. Si Aruba Bank derota Jaguars lo hunga un wega extra pero si Jaguars gana e ta termina invicto 6-0 y lo titula campeon. Aruba Bank Lady Tigers 13 careda, 11 hit, 2 eror. Rebels 2 careda, 2 hit, 6 eror. Riangela Flanegin a domina e monticulo pa bay cu e victoria mientras Shatienne Kock a resulta pitcher perdedo. Miho batiador pa Aruba Bank a resulta Riangela Flanegin aportando na su propio causa batiando di 4-4, Yonina St Jago a bay di 4-3, Ilajay Tromp di 3-2. Pa Rebels a destaca na plato Shadifa Lewis 1-1 y Zjaika Kock di 2-1. Mester bisa cu e hobennan di Rebels ta mustrando hopi animo y trahando duro den corto tempo nan lo ta competitivo. Cu e resultado aki Aruba Bank ta posiciona su mes solido na di dos luga cu 4 victoria y 1 derota mientras Rebels ta 0-5 en busca di nan prome victoria. Softball femenino den pleno desaroyo.