Recientemente e Departamento di Relacionnan Exterior tabata anfitrion di coleganan di e paisnan di Reino Hulandes, cu a bin Aruba pa un reunion riba tereno di tratadonan internacional. Representantenan di e Ministerio di Relacionnan Exterior na Den Haag y di e Departamentonan di Relacionnan Exterior (DBB) di Sint Maarten, Corsow y Aruba a repasa conhuntamente e diferente tratadonan cu ta den proceso pa wordo ratifica y implementa pa e paisnan. Aruba, como parti di Reino, ta forma parti di un gran cantidad di tratado y acuerdo internacional, cu ta crea oportunidadnan importante pa nos pais.
E asina yama “Verdragenoverleg” ta un encuentro cu ta tuma luga tur aña, cada biaha den un di e paisnan di Reino Hulandes, y ta percura pa esnan encarga cu e tema aki por coordina maneho, den e caso aki riba tereno di tratado. Hasiendo uso di medionan tecnologico cu ta disponible awendia, por hasi e comunicacion entre e departamentonan mas efectivo.
Riba e potret por mira e participantenan na e Verdragenoverleg cu a tuma lugar recientemente na Aruba, cu participacion di representantenan di e Departamentonan di Relacionnan Exterior di Reino Hulandes.