Desde diadomingo ultimo Minister Otmar Oduber den e funcion como lider di delegacion conhuntamento cu e delegacion di Reino Hulandes, diamars mainta tabata huesped di un mesa di discusion cu a hala hopi atencion na e conferencia di Nacionnan Uni esta, “High Level Political Forum for the SDG’s 2018”.
Durante e mesa di discusion aki, Aruba hunto cu Hulanda y IFAD, a presenta y intercambia riba e trabounan di “Aruba Centre of Excellence for SIDS” cu ta wordo mira como ehempel di colaboracion y intercambio di conocemento. Director di Aruba Centre of Excellence for SIDS (COE) a duna un exposicion amplio di e trabounan te cu awor y pa futuro.
“Aruba Centre of Excellence for SIDS” a wordo estabeci pa Gobierno di Aruba den colaboracion cu Reino Hulandes y UNDP, pa comparti e mihor practicanan. Actualmente Aruba ta sumamente active cu planificacionnan relaciona cu SDGs, manera inovacion, implementacion di SDG y e maneho di medio ambiente cu a wordo lansa recientemente den cual a uza un metodologia di SWOT, unda a haci un analisis di ‘Strengths’ (Forsa), ‘Weaknesses’ (Debilidad) , ‘Threats’ (Peliger) y ‘Opportunities’ (Oportunidad). Na prome instante a enfoca riba un acercamento pragmatico y a scoge 4 tema di prioridad cualnan ta maneho di desperdicio, especienan y areanan protegi, naturalesa y salubridad y cambio di clima. Pa asina den un siguiente trayecto enfoca riba e otro temanan defini. A base di SWOT a formula strategianan y a transforma esaki den accionan concreto.