Arkeologonan a descubri luga unda Huan Bautista a cuminsa su mision di anuncia Cristo

0

HEBRON, Cisjordania- Un grupo di arkeologonan recientemente a descubri na Tera Santo un monasterio riba e luga caminda probablemente Huan Bautista lo a cuminsa su mision di anuncia Cristo.
E Christian Media Center (CMC) a informa cu e excavacionnan a cuminsa mas o menos 70 aña pasa den e compleho yama “Ain el-Ma’moudiyeh” o “Fuente Bautismal”. E luga aki ta situa na e ciudad di Hebron, na Cisjordania.
Ta presumi cu Juan Bautista lo a nace y crece na Hebron y el a biba akinan cu su mayornan Zakharias y Isabel. Ademas, Maria, mama di Hesus a bishita Isabel akinan ora cu el a haya sa cu Isabel tabata na estado, a pesar di su edad halto.
Bertrand Riba, e arkeologo responsabel di e excavacion a indica na CMC, cu specialistanan a haya un baptisterio, loke el a califica di ” e mas profundo di Palestina” y otro monumento liga na esaki”. Ta trata di un misa, un construccion monastico. Ta un compleho cu ainda mester wordo descubri.
Jerôme Haquet, otro di e arkeologonan cu ta traha na e luga a indica cu den e monasterio por aprecia murayanan cu ta data di siglo XII. Sin embargo, un siglo despues Hebron a wordo destrui pa e crusadanan y despues el a keda bou dominio di e musulmannan.
Ain el-Ma’moudiyeh no ta e unico luga na Tera Santo cu ta relaciona cu e figura di Huan Bautista. Na Jordania ainda a keda conserva e luga den e riu Jordan, unda segun tradicion, Hesus a wordo bautisa pa Huan Bautista.
Fuente: https://www.aciprensa.com