Na Februari 2013, Parlamento di Aruba completo, pues 21 miembro, a bay di acuerdo den un mocion pa asina urgi na gobierno di Aruba pa den un termino di 3 luna, declara areanan specifico manera pidi door Aruba Birdlife Conservation, por medio di un landsbesluit, como areanan protehi y na unda cu Parke Nacional lo mester wordo encarga cu e maneho diario. Esaki lo ta posibel por medio cu nos Ruimtelijk Ontwikkelingsplan yama ROP. Un plan cu na 2009 a keda anuncia. Y bou di esaki tambe ta cay e mangelnan/mangrovenan di Pos Chikito, pa ser specifico esun di Isla di Oro.
Recientemente UPP a tuma nota cu esnan cu ta preparando e proyecto na dicho sitio, cu nan a laga sa cu nan ta wardando riba gobierno di Aruba, cu ta cambiando e ROP (cu ta destina pa wordo cambia na 2019), pa asina nan por cuminsa cu e proyecto. Pa nos esaki ta mustra atrobe, cu mester tin palabracionnan haci caba entre minister cu ta bay duna permiso y desaroyadornan. Mescos cu ta e caso di Urirama, pa loke ta trata e molinanan di biento y na Bubaliplas pa loke ta trata e proyecto di Azure.
E tempo ey como independiente den Parlamento, lider di UPP a vota na fabor di e mocion aki pa asina gobierno di Aruba tene cuenta cu e deseonan poni den e peticion di Aruba Birdlife Conservation. Den e programa di UPP pa eleccion 2013 tambe tin poni e imporancia pa cumpli cu pensamento di e principionan di People-Planet and Profit. Esta respeta y stimula iniciativanan particular cu ta contribui na e crecemento economico, social y spiritual di nos pueblo, y cu mester desemboca den e prosperidad y bienestar pa nos pueblo, dunando asina pues na e inversionista, tanto local como stranhero, e espacio pa haci ganashi, pero poniendo nos hendenan y nos mama tera central.
Analisando e proyecto di Isla di Oro, esaki ta mustra den direccion di un desaster ecologico y no ta sirbi e principio di 3P-nan. E ta sirbi pa unicamente yena saco di inversionistanan, compinchinan y esnan cu cierto interes. E unico P cu e ta cumpli cu ne ta esun di PROFIT.
Ora wordo bisa cu ta trata aki di un proyecto eco-turistico, nos no ta mira cu mester bin cu 300 camber eynan pa bo por eherce eco-turismo. Eco-turismo ta momento cu bo ta proteha bo medio ambiente, y percura pa wordo rehabilita pa asina turistanan cu por wel di keda na otro hotelnan, pero cu ta bin disfruta di e naturalesa na e sitio. Kico ta bentahanan cu tin na e sitio si un hotel asina bin? Pa pueblo? Ta bolbe sera un caminda pa pueblo por yega.
Ya caba nos pida baranca ta satura cu hotel riba tera y awor kier bay construi riba awa. Ki otro pobrecho tin? Ultimo añanan a bira normalidad cu empleo ta wordo crea pero pa importa forsa laboral nobo. Pakico lo mester importa trahado? Pasobra e mercado laboral no ta wordo sirbi cu mas empleonan cu salarionan minimo. Pues e P di People no ta wordo sirbi.
Ta bay sacrifica e bunita area na Pos Chikito. Un area limpi y sano djis pa satisface un afan di un inversionista stranhero pa gana placa. Pues e P di Planet tampoco ta wordo sirbi. E area di Pos Chikito ta importante pa flora y fauna. Ta sitio unda cu piscanan ta broei pa asina bay lama grandi bek, sin conta e turtuganan.
Mientras nos ta tende cu nan ta wardando riba e cambio di e ROP, e inversionista ta paga un compania pa traha un MER pa tira santo den wowo di pueblo djies pa e gana miyones. Djies pa su propio interes. Pues pa e por cumpli cu e P di PROFIT. Mescos cu e compania cu a bin pa cambia nos ROP. Pa acomoda Isla di Oro, Urirama y Bubali Plas. Nos pregunta ta, kico a para di e ehecucion di e mocion di Parlamento? Ta lastima pa tende awor cu parlamentarionan, cu tin opinion riba tur sorto di cos, awor aki parce cu nan kier bay wak kico ta e balor agrega di un proyecto asina pa nos economia y cu pesey no tin opinion ainda riba esaki. UPP ta kere cu den bida tin cosnan ta un state of mind cu no sin mas nos por grita awe contra un proyecto y mayan kizas pa probechonan di interes propio. UPP ta urgi na parlamento pa exigi di gobierno pa ehecuta loke a keda acorda na 2013. Y si nos kier pa mantene e edificio riba cay pa duna honor na “Isla di Oro” UPP ta mira cu bou maneho di parke nacional, por bin un centro di informacion pa loke ta concerni nos mangelnan, nos rikesa di laman y tambe nos piscadornan. Cu lo bira un centro cu por sirbi realmente como un atraccion eco-turistico na unda medio ambiente, historia y nos hendenan por biba den harmonia y balance cu otro. UPP ta bisa NO na mas construccion na e sitio ey.