Awe diasabra Polisnan Maritimo a lanta masha activo atrobe ora cu e barco Arcangel Miguel a raporta cu el a topa cu 3 tripulante den lama na un distancia di 30 miya pabou di Aruba. A scucha grito y ora a bay check a nota 3 hende landando den lama bruto, pa cual a rescata nan mesora. Nan barco a zink for di diahuebs marduga caba y tin 2 dia caba den awa sperando ayudo.
E tripulantenan a conta cu nan tabata biniendo Aruba cu e barco di carga “Quien lo diria” cu normalmente ta trece fruta cu berdura. Pero e biaha aki nan a transporta carga di construccion. Polis ta sospecha cu a stiwa e carga malo pa cual e boto a zink durante e trayecto, na momento di topa lama bruto pabou di nos isla.
Aki na tera Polisnan Maritimo a percura pa activa tur instancia, sperando riba yegada di Arcangel Miguel awe diasabra mainta na waf di Barcadera. Asina e seccion di Slachtofferhulp di Cuerpo Policial Aruba a yega na waf pa brinda asistencia na e tripulantenan, mescos tambe Ambulance pa check nan estado di salud. Cu ayudo di slachtofferhulp nan lo mester atende cu nan agencia local y cu Consul di Venezuela pa percura pa nan por regla documentonan necesario pa biaha bek pa Venezuela.