Diahuebs 20 di October, Aqua for Aid (Aqua48) a otorga su di CUATER donacion recauda cu awa bendi na restaurantnan participante. E donacion a bay pa Donkey Sanctuary Aruba. Representante di Aqua48, Manon Hekman hunto cu representantenan di WEB y restaurantnan participante a haci entrega di e donacion na directora Desiree Eldering. Aqua48 ta encera un iniciativa caminda consumidornan cu ta order awa den restaurant por scoge entre awa gratis y Aqua48 pa 1 florin cu refill gratis. E siguiente donacion ta bay pa Stichting CasMarie.
Un comision di asignacion, cu representantenan di WEB Aruba, CEDE Aruba y e restaurantnan participante, cada cuartal ta dicidi riba alocacion di e donacion di Aqua48. Pa e prome donacion a scoge pa honra e peticion di SABA pa stoelnan recliner. E di dos donacion a bay pa un proyecto di plantacion sostenibel pa muchanan di Kinderhuis Imeldahof. E di tres donacion tabata pa material special pa Fundacion Siñami Paso pa Paso Aruba. Awor a toca turno di Donkey Sanctuary Aruba cu recientemente a muda pa un localidad nobo. Nan lo uza e donacion pa finalisa e trabounan cu falta na e localidad nobo.
Siguiente donacion pa CasMarie
E donacion di Aqua48 pa e siguiente cuartal ta destina pa e categoria ‘Hende Grandi’. A scoge pa Stichting CasMarie, un fundacion pa cuido di pashentnan cu un demencia. CasMarie ta brinda guia, sosten y of pasadia durante henter e proceso di demencia. E meta di CasMarie ta pa aporta na un manera positivo y profesional na calidad di bida di e persona cu demencia y nan famia. E fundacion lo uza e donacion pa material relaciona cu nan proyecto di bario, un servicio cu lo introduci den futuro, pa guia personanan cu ta sufri di demencia den nan propio ambiente y bario.
Ta pidi pueblo en general pa sostene e causa aki bebiendo Aqua for Aid (Aqua48) den tur restaurant participante.
Riba e website Aqua48.com tin mas informacion tocante meta y proyectonan di Aqua48. Via e website organisacionnan caritativo por aplica pa un donacion. E donacionnan di Aqua48 ta posibel danki na sosten di diferente organisacion. WEB Aruba ta sostene e proyecto financieramente y promocionalmente. CEDE Aruba ta yuda cu e ehecucion practico di e peticionnan pa donacion.