Scol Caiquetio a introduci e proyecto “Wela di Scol” 14 aña pasa, tempo di Priepeb, en conexion cu e programa “Ban crea un scol cu cuido y cariño pa un y tur.”
Pa pone den practica loke e muchanan a siña, scol a adopta un habitante di Cas di Nos Grandinan na San Nicolas, nan Wela di Scol cu tabata sra. Clementina Berkel, mihor conoci como Ma Tina q.e.p.d.
Ma Tina a nace na St. Eustatius na aña 1926 y na edad jong el a bin biba Aruba.
E no tabatin famia na Aruba.
Tur siman un klas tabata bishita Ma Tina durante parti di nan pause den e cas di anciano caminda e tabata biba pa combersa cune of pa entreten’e cu wega di mesa, door di declama poesia, canta of hiba algo pe.
Scol Caiquetio tin un logbook masha bunita di e proyecto Wela di Scol.
Den e logbook por lesa e.o. di e bida di Ma Tina, un storia di “un dia den bida di Ma Tina” caminda e ta conta di un dia den su hubentud, cantica cu e muchanan a traha pa su aña, un poema cu a traha pa su 88 cumpleaños y lespakketten.
Scol Caiquetio a haya importante pa e proyecto continua y for di November 2015 a adopta e bisiña di scol, sra. Elizabeth Bastiaanse, mihor conoci como Ma Bep, como nan siguiente Wela di Scol.
Ma Bep a haci hopi pa nos comunidad tempo e tabata mas hoben. Su casa a fayece, su yiunan ta biba na Hulanda y awor e bisiñanan y Scol Caiquetio ta cuid’e. Tur siman un klas di Scol Caiquetio ta bishit’e pa dun’e un rato di atencion y alegria.
E proyecto Wela di Scol ta siña e muchanan pa tin respet y cariño pa nos grandinan.
E cabesante di Scol Caiquetio a menciona cu continuidad ta e secreto di tur proyecto exitoso.