FCCA ta participa na e comunidad Arubano cu e 15 casnan construi den e proyecto Smart Community Aruba na Kibaima a wordo finalisa y e traspaso di e esakinan for di e contratista a tuma luga. FCCA na su turno a prepara un procedura di registracion pa esunnan cu tin interes pa huur un di casnan aki y tambe cu ta dispuesto pa participa na e experimento/estudio cu TNO lo hasi conhuntamente cu e otro partnernan den e proyecto.
Proyecto Smart Community Aruba
FCCA a desaroya y a construi e proyecto aki den colaboracion cu otro partnernan manera Utilities Aruba N.V., N.V. Elmar, WEB Aruba N.V., Pais Aruba y TNO Caribbean. Ta trata aki un proyecto planea cu 20 vivienda, for di cual den e prome fase a construi 15 vivienda energicamente eficiente. E obhetivo di e proyecto ta pa conhuntamente cu e partnernan hasi experimento y crea mas conocemento cu lo ta na beneficio di pais Aruba y henter e comunidad di Aruba. Smart Community Aruba lo bira un bario residencial cu lo fungi como un isla di energia sostenibel dentro di Aruba. Locual ta fundamental ta pa haci investigacion y desaroya solucionnan tecnologico cu por wordo expande y crea modelonan cu ta haci e transicion pa sistemanan di energia sostenibel un realidad. Pa FCCA ta importante pa por siña con pa construi casnan mas eficiente y tambe con pa haci adaptacion nan na nos casnan existente.
Profila di huurdo
Tur esunnan cu tin interes y un enfoke pa biba den un bario manera di Smart Community Aruba, cu kier siña hunto cu e partnernan di Smart Community Aruba, sea bo ta un young professional, un famia cu yiu of un pareha 55+, pasa libremente na oficina principal di FCCA na Sabana Blanco pa busca informacion of bishita nos website www.fcca.com pa yena e formulario di aplicacion online. Por haya informacion di e proyecto aki tambe bishitando e website di Smart Community Aruba, www.smartcommunityaruba.aw
Ta importante pa remarca cu pa bin na remarca pa huur un di e casnan, e solicitante mester yena e formulario di aplicacion, cual lo encera tambe un descripcion di e motivacion y interes cu e aplicante tin pa kier biba den un bario manera esaki. E aplicante mester sa cu como huurdo e mester ta dispuesto pa duna cooperacion – na cualkier momento – encuanto e midimento y monitor di consumo di coriente y di awa y/of otro informacion etc. etc. etc. y laga comparti esaki cu FCCA y e partnernan di Smart Community Aruba.
Con pa aplica ?
Tur esunnan interesa por scoge un di siguiente formanan pa aplica:
• Yena e formulario special na un di e oficinanan di FCCA
• Yena e formulario special digital online via website www.fcca.com, Smartcommunity.
Aplicacion lo ta habri entre 18 di December te cu 31 Januari 2018.