DEN HAAG – Na WTC The Hague Art Gallery a tuma luga diaheubs apertura di e exposicion “Gezichten van Aruba”. Esaki ta di tres biaha cu e exposicion aki cu potretnan di e conocido fotografo Hulandes Raymond Ruting ta wordo teni.
Minister Plenipotenciario Alfonso Boekhoudt a tene na e ocasion aki un discurso unda el a bisa di ta contento di por ta parti di e exposicion aki cu ta forma parti di e celebracion di 30 aña di Status Aparte di Aruba. ‘Despues di apertura oficial na Hilversum, mi ta hopi contento cu WTC The Hague Art Gallery ta tene e exposicion aki. Nos ta sigur cu e exposicion ta brinda e bishitantenan di WTC un impresion real di e Arubiano: nan amor pa nan pida baranca y nan orguyo pa ta forma parti di algo bunita y special.’
‘Fotografo Raymond Ruting a haci un trabao maraviyoso den capta retrato di Arubianonan conoci y menos conoci den nan mesun ambiente. Bo no ta mira unicamente expresion, pero tambe emocion, caracter y balor,’ asina e mandatario a bisa.
Sr. Boekhoudt e referi den su discurso na e caracter special di e localidad na WTC The Hague. ‘Akinan nos lo logra na atrae un otro publico na e exposicion aki. Esakinan ta comerciantenan cu ta bishita WTC pa nan trabao of meetingnan comercial. Aruba ta conoci pa su industria turistico, pero ultimamente Aruba ta mas y mas conoci como un luga pa haci negoshi. Specialmente si como comerciante bo ta enfoca riba Caribe y America Latina. Tira un bista riba algun potret y bo ta mira comerciantenan Arubiano. Nan tin den comun cu otro, cu nan tin hopi talento, dedicacion y nan tur ta trahadornan balente. Asina Aruba tin mas di brinda cu unicamente solo y playanan cu santo blanco, asina sr. Boekhoudt a bisa.
Finalmente Minister Boekhoudt tabata tin palabranan di aprecio pa fotografo Raymond Rutting, kende den cooperacion cu ATA a haci e exposicion aki posibel. ‘Mi ta spera cu cada bisihitante lo disfruta di “Gezichten van Aruba” cu riba su mes ta conta un historia.’