Skirbi pa Clyde Harms
Diasabra nochi a tuma luga e tan espera apertura di Aruba Symphony Festival 2018 na Cas di Cultura cu dos coro di canto local, Cantare y Ars Nova, y e internacionalmente conoci Piano Trio Reverón. E programa di e concierto di berdad tabata varia: E coro Cantare ta conta solamente cu stemnan di hende muhe mientras cu Ars Nova ta conta cu tenor y baho ademas di e bosnan femenino soprano y alto. Nan a canta canticanan religioso, clasico, di diferente epoca, di diferente parti di mundo y canticanan di nos compositornan Rufo Wever y Padu del Caribe. Algun di e piesanan a wordo canta a capella, otronan tabata acompaña pa piano, guitara of cuatro. Hopi variacion! Aunke Cantare y Ars Nova tabata falta algun miembro cu tabata na vacantie, e directora Mayra Kock Garrido a logra un nochi exitoso door di presta cantante di un coro na e otro. Pan Cayente di Rufo Wever a haya un tremendo aplauso. Ave Verum di Mozart, canta pa Ars Nova, a conmove hopi hende.
Despues di pauze, e Piano Trio Everón, consistiendo di Ana Maria Otamendi na piano; Horacio Contreras, cello, y Simon Gollo, fio, a fascina e publico presente cu Piano Trio No.1 Op.49 di Mendelssohn. Simon Gollo y Horacio Contreras a mustra pakico nan merece tur e reconocementonan internacional cu nan a yega di ricibi. E fio di Gollo tabata combersa cu e cello di Contreras manera dos persona. Un amigo tocado amateur di piano a comenta n’ami: “Ana Maria a pone su piano papia cu dulsura den tur lenga”. Piano Trio Reverón a merece e ” standing ovation” y “curtain calls” cu nan a ricibi di e publico emociona.
Diadomingo den e sala chikito di Cas di Cultura ocho studiante a compiti pa e “Clyde Harms Scholarship” cu Aruba Symphony Festival ta otorga na e ganado tur aña. E premio ta encera, entre otro, cu e ganado lo toca solo den e festival di e siguiente aña.
Cuminsando cu e violonista Yuko Tanaka cu a bin di e otro banda di nos planeta, Hapon y finalisando cu e violinista Ronald Villabona, di nos propio hemisferio, tur e participantenan a impresiona e publico cu nan nivel halto como musico. Un participante cu a gana curason di nos tur tabata Daniela Perez, un Venezolano di Tachira di apenas 13 aña cu a toca dos piesa di J. S. Bach. E cellista Mericano Calvin Armstrong a interpreta magistralmente un piesa di Sonata pa Cello solo No. 8 di e musicologo Hungaro Zoltan Kodaly, un piesa cu ta carece melodia pero masha interesanta pa scucha y dificil pa toca. Ami no ta envidia e miembronan di e hurado cu mester a selecciona e ganador cu lo wordo anuncia durante e concierto di clausura 29 di juli na Cas di Cultura.
Awe, diamars 24 di juli, Aruba Symphony Festival lo continua na Ritz-Carlton Ballroom cu un programa masha varia cuminsando cu tango di Piazzola te cu musica di Schubert. E maestronan di diferente instrumento musical lo toca solo, den trio of quinteto. Entre e musiconan cu a bin di diferente pais tin tocado di bassoon, flauta, clarinet, cello, viola y fio. Esaki ta un oportunidad cu ningun amante di bon musica por perde. Entrada ta gratis danki na un gesto bunita di Louella Brezovar van Veen, e directora di e prestigioso hotel. Nos ta topa awe nochi na Ritz-Carlton! [email protected]