Ta increibel loke esunnan encarga cu Palo Marga a bin topa cun’e awe mainta na pista di Palo Marga. Malhechor/anti-socialnan a drenta e facilidad y a causa basta destruccion, kibrando varios tubo di awa y lagando nan tur tira un banda. Esaki por simplemente wordo considera vandalismo di mala fe paso no por papia di ladronicia como cu tur e tubonan di koper cu a wordo saca for di bou tera y kibra a wordo simplemente laga atras, pues aki no ta trata di ladronnan di koper cu e bin busca tubo pa nan bai bende. Rooinan largo di awa a keda core na varios parti di e pista, asfalt y vloernan nan kibra etc etc. Loke ta di remarca ta cu e pista tabata tin basta luna largo cera y nada di esakinan a pasa, apenas 2 siman pasa a cuminsa cu e prome evento exitoso di Street Legal y net 2 dia prome cu e siguiente evento di Street Legal, e tipo di cosnan aki ta tuma lugar. Esunnan concerni ta haya esaki hopi jammer ya cu apenas a drenta un suma di placa cu por wordo usa pa asina upgrade y drecha e lista largo di cosnan cu tin cu wordo atendi cun’e y awor tin cu bay pone tur tubo nobo paso awa ta algo cu nan mester tanto riba e facilidadnan manera baño y cushina pa asina e actividadnan por continua.
For di oranan tempran di mainta cu e acto aki a keda descrubi, di biaha Sr. Frenk Werleman a cuminsa move shelo y tera pa por drecha tur loke a wordo kibra pa asina diabierna awo e evento di “Dera Gai Street Legal Night” por continua normalmente. Pues shonnan ban cuida nos pista Palo Marga paso ta 1 nos tin aki na Aruba y si nos mes no cuidele ningun hende lo haci’e pa nos.