AMSTERDAM- Diahuebs 5 di October cerca di 35 studiante di Aruba, Bonaire y Corsou tabata di bishita na e Anne Frank Huis na Amsterdam. E cas famoso aki, caminda e mucha muhe Hudiu Anne di e buki ‘Het Achterhuis’ a sconde, a habri su portanan pa di tres biaha pa un bishita exclusivo organisa door di Fundacion We Connect.
Cas bashi
E fundacion, cu tin un meta educativo, kier trece studiantenan di Caribe den contacto cu historia y cultura. E bishita a haci un impresión grandi ariba studiantenan di prome aña. “Durante e discurso bunita di Ronald Leopold, director di Fundacion Anne Frank, e studiantenan tabata hopi keto. Leopold a bisa cu e Anne Frank Huis ta un ‘cas bashi cu alabes ta asina yen’. Tambe el a referi na e balor actual di Anne Frank, nos deber moral pa no exclui un otro. E Anne Frank Huis ta ricibi cerca di 1.3 miyon bishitante pa aña.
Reaccion
Despues di e bishita na het Achterhuis mes, completamente cu un audiotour, e studiantenan a wordo ofreci un bebida pa refresca nan garganta. Un studiante di Corsou, studiando na e Scheepvaart- en Transport College na Rotterdam a remarca: “Eigenlijk nunca mi a gusta geschiedenis y musea pero e storia aki si ta hala mi atencion”. Un studiante Arubano di Bedrijfseconomie a suma su imprension: “Ora bo ta cana door di e cambernan chikito caminda cu famia Frank, un famia di 8 a biba, bo ta realisa con bo bida con bo bida por cambia”. Jerome Ballinge, guia di studiante pa studiantenan for di Bonaire, Saba y Statia a describi e ambiente como uno di ‘hope and despair’.
Bishita di trabao di WeConnect
Tanja Fraai y Mike Ho-Sam-Sooi, fundadonan di WeConnect, lo haci un bishita di trabao na Corsou y despues sigui pa Bonaire. Nan lo duna workshopnan di film na Maria Immaculata Lyceum ey lo bishita un scol tambe na Bonaire. “Nos lo trece un film cortico caminda studiantenan di prome aña ta conta di nan experiencia tocante bida y studia na Hulanda. E imagennan aki nos lo pasanan den e siguiente grupo di studiantenan, pa asina nan ta mas miho prepara ainda pa ora nan bin Hulanda”.