Andin Bikker, miembro di Partido POR, Plataforma Forza Nobo, en ocasion di e presentacion di dos candidato nobo riba riba nan lista, sr. Curtis Fraser y sra. Robin Ann Didder, di distrito di San Nicolas a tuma palabra, prome cu e rueda di prensa extraordinario a conclui.
El a bisa na e dos candidatonan nobo cu sin duda no ta facil pa drenta arena politico, y cu ta di respeta e decision aki. E candidatonan aki a trece dilanti dos tema cu POR a touch a subraya y duna hopi importancia cualnan ta Educacion y reenforsa Parlamento. El a para un rato riba reinforzamento di Parlamento y a bisa: manera boso sa for di 2010 caba, apenas un paar di luna den Parlamento, mi persona realisando cu un parlamento cu un democracia hoben manera Aruba ta, cu apenas 30 aña di existencia como pais, mi a traha un concepto pa un reglamento di orden nobo, pasobra na final di dia, Parlamento ta reuni y opera riba e reglamento aki. Lamentablemente, varios biaha cu sosten di Marisol Lopez-Tromp como voorzitter nos a purba pa e reglamento aki bin na vigor, pero gran mayoria den e Parlamento no a dune importancia, y nos ta wak cu gran parti di e votadornan, e mileniusnan eyfo cu ta e grupo mas grandi cu ta bay participa den e eleccionnan venidero, hopi biaha nan ta expresa nan frustracion y desapunto, con Parlamento ta funcionando.
El a bisa cu ta pa e motibo ey e ta sumamente contento cu aworaki e dos candidatonan a expresa esaki, sr. Fraser, bisando cu p’e ta di importancia sumamente grandi di reforsa Parlamento y sr. Otmar Oduber a bisa ora e Plataforma nobo a wordo anuncia. Pesey mi ta hopi orguyoso di mira cu un candidato a tuma esaki como tema central y principal y siguramente e tin rason cu mester pone atencion na esaki. Encuanto enseñansa y educacion nos a haci un bishita na Mexico caminda nos a experiencia virtualmente e Congreso EDUCA, cu ta pa henter America Latina y nos a mira con hopi tecnologia aworaki ta facilita y reenforsa e trabao di maestronan. E ta sigur cu Roben Ann cu su antecedente y cu e ta un hende hopi progresista ta bay make cu tecnologia y pueblo di Aruba por ta sigur cu POR lo hiba dimensionnan nobo y nos lo hiba nos pais dilanti. Na final Bikker a bisa cu aunke hopi hende no ta realisa, na final di dia ora a pone un plataforma di un partido e ta sirbi su pais, y no e politiconan mes.
“Diasabra cu ta biniendo nos ta bay celebra un dia mas cu hopi amor Patrio, pero sigur boso por conta cu cada un di nos, esnan cu ta aworaki y esnan no presente pero cu nan spirito cu nos, nos lo bay sirbi e pueblo digno di Aruba”.