Andin Bikker a bisa den conferencia semanal di prensa cu mas y mas hende ta acerca Partido Democracia Real pa introduci e opcion di por baha cu pension na un edad mas hoben.
E lider di PDR a trece dilanti cu ora e gobierno di Aruba a introduci e aumento gradual di edad di pension te cu 65 aña PDR a presenta un concepto di amienda caminda e persona por baha cu pensioen na un edad mas hoben, pero e ta haya un korting te ora e yega e edad di pensioen cu awor ta stipula.
El a splica cu esaki ta preveni cu e persona keda varios luna of añanan den bashi pasobra nan a calcula cu nan lo baha cu pensioen na edad di 60 aña.
El a bisa cu tin profesionnan cu ta demanda hopi di e trahado por ehempel esnan cu ta haci trabaonan riba pia, cu ta afecta nan salud y pa algo nan a calcula nan pensioen na nan 60.
Andin Bikker a tuma nota cu na Hulanda cada aña nan ta revisa edad di pensioen y recientemente nan a subi edad di pensioen cu tres luna adicional. E tabata 67 y awo nan a bay 67 y tres luna.
PDR ta boga pa ora personanan ta sinti cu nan curpa no ta duna mas, pa nan por bay pensioen un tiki mas tempran pero nan ta haya un korting mientras tanto te ora nan yega edad di pensioen stipula, nan ta haya full pensioen.
El a bisa cu manera e trend ta bayendo ta parce cu ora bo yega 85 aña den e flor di bo bida bo ta pasobra aparentemente ta keda hisa edad di pensioen.
Andin Bikker a bisa cu PDR kier evita esaki door di bay cu pensioen un tiki mas tempran anto pa salvaguardia e fondo por bin cu cierto garantianan pa evita cu e fondo aki ta bay haya demasiado persona den e areglo aki, anto bo ta introduci un tipo di keuring pa wak enberdad ken por bay un tiki mas tempran cu pensioen y ken por wanta traha seis luna of un tiki mas.
Bikker a bolbe bisa cu hopi hende ta haciendo apelacion na Democracia Real pa introduci e opcion pasobra ta hopi hende esnan cu traha riba nan pia 8 ora diario of cu tin profesionnan cu ta rekeri di nan hopi esfuerzo físico, cu ora di yega 60 aña nan curpa no ta duna mucho mas.
Bikker ta haya cu aki na Aruba mester tene cuenta cu nos situacion local, cu nos hendenan, y introduci un pensioen cu ta flexibel. Si nos wak nos isla ruman Curacao cu nan a hisa pensioen gradualmente nan a introduci tambe articulo 6 di nan ordenanza e opcion di baha cu pensioen na un edad un tiki mas abao, pero ta haya un korting riba e pensioen te ora yega na edad stipula cu ta haye full.