Andin Bikker: Ley di AZV no tin e aspecto di prevencion

0

Partido P.O.R , E Forsa Nobo a presenta su plan di gobernacion , den esaki tin e plan di accion cu e partido completo lo haci un reforma riba salubridad. E reforma ta basa riba e principio di e concepto cu actualmente ta ley di AZV . Actualmente AZV ta dirigi basicamente na momento cu un malesa ta presenta su mes na un persona. Loke ta lamentabel cu den e ley di AZV no tin e aspecto di prevencion.
Pa Andin Bikker esaki ta e motibo cu Partido P.O.R, E Forsa Nobo a dicidi di modernisa e ley di AZV pa asina pone e aspecto di prevencion den e ley. Actualmente si un persona ta desea di haci un check up general no por ta posibel solamente si e dokter di cas en contra un sintoma cu ta indica cu posiblemente tin un malesa. Esaki ta e motibo cu hopi ciudadano na Aruba ta bay den exterior y den menos cu 3 ora e pashent ta haya su resultado. Sinembargo na Aruba na momento cu e pashent bay su dokter di cas e lo mester ta sufri di un malesa of tin cierto sintomanan pa e dokter por haya indicacion pa e pashent por haci un check up general.
Segun Bikker e situacion aki ta frustrante debi cu te na momento cu haci un check up general y si detecta cierto malesanan e ora hopi biaha ya caba e pashent ta den un estado hopi avansa. Andin Bikker di Partido P.O.R, E Forsa Nobo ta kere cu Aruba mester bay den un dimension cu tur hende mester por haci un check up general anualmente, principalmente e grupo di risico y of cualkier persona pa haci e control pa su propio bienestar. Asina aki tambe di antemano por preveni si e persona ta na caminda pa haya cierto malesanan. Esaki ta significa cu den un periodo hopi tempran por detecta si e persona aki mester di tratamento pa por preveni cierto malesanan.
Andin Bikker di Partido P.O.R, E Forsa Nobo ta confia cu e posibilidad pa un persona haci un check up general ta na su luga, enbes cu na momento cu tin sintomanan so di cierto malesa e ora tin indicacion cu e ciudadano por haci un check up general y si e dokter no ta haya cu ta necesario e persona no lo haci su check up pa por kita su dudanan di loke e ta sinti.