Andin Bikker: Inseguridad na Aruba tin un nomber: Minister Arthur Dowers

Segun Parlamentario Andin Bikker, AVP ta keda tene man riba cabes di un Minister di Husticia mediocre. Atraconan ta tuma lugar tur caminda y presonan ta huy y niun hende no sa nada di nan mas. Asina mes AVP ta keda mantene e Minister den e funcion. Riba dje e Minister a haya dos sentencia contra dje den cual a constata cu el a viola leynan di contabilidad. Awor pa colmo ta bai entrega keho penal contra dje. Asinames e ta sigui opera sin un plan drechi y door di esaki Parlamentario Bikker ta kere cu e Ministter mester tuma honor na su mes y tuma su retiro.
Oposicion a purba di bin cu un mocion di desconfianza pero AVP a stroba esaki. Comerciantenan a señala cu ladronnan ta horta pa loco den nan tiendanan y ta warda e guardianan di seguridad bai cas pa horta den ora di mainta trempan. Segun Andin Bikker, e sentido di seguridad cu AVP a priminti, pueblo tin 4 aña ta warda riba dje, Gobierno a faya barbaramente den restaura e seguridad aki na Aruba y trece e trankilidad bek. Parlamentario Bikker a finalisa bisando cu tur e drama aki tin un nomber y fam y esey ta Minister Arthur Dowers y e mester haya un señal cu ta ora pa retira.