Por a tuma nota di e conmocion cu tabata tin den comunidad, unda cu a sali den prensa cu Setar a cuminsa na Merca un caso contra di un ex- empleado pa malversacion. Sr. mr. Andin Bikker ta amplia mas ariba esaki.
Setar ta un compania estatal y ta cay bou di su comision, cu e ta presidente. Sr. mr. Bikker ta presidente di e Comision di Companianan estatal, por lo tanto, su persona hunto cu Sra. drs. Marisol Lopez- Tromp a pidi un reunion publico pa Minister di Telecomunicacion, Mike de Meza lo mester bin den parlamento y splica un rato riba e caso aki. Segun mr. Bikker, e minister mester por tabata sa di esaki. Y tin hopi interogante den pueblo y como representante di pueblo, y mirando e suma cu ta wordo alega cu a wordo malversa, y haciendo nan trabao como parlamentario ta nan derecho di wordo informa di kico a pasa.
Sr. mr. Bikker a sigui splica cu Setar ta 100% un compania estatal di pais Aruba y su dividendonan cu bin di Setar ta bin den presupuesto di Pais Aruba. Y den e presupuesto 2017 no tabata tin melding di esaki. Ta nan trabao como representante pa controla gobierno y obviamente e minister, te na cierto grado mester por tabata sa di e echonan aki, como accionista na nomber di pueblo.
Basa ariba loke a sali den prensa, y cu nan propio informacion, ta nan derecho pa haya mas informacion di kico exactamente a pasa y asina duna cuenta na e pueblo.
Minister ta responsabel politicamente y e ta esun cu mester duna cuenta na Parlamento y ta via Minister parlamento lo haya nan informacion. Segun reglament van orde, mester di tres parlamentario pa firma pa yama un reunion publico.
Ta na bienestar di pais Aruba, pa haya claridad ariba e tema aki, segun Sr. mr. Bikker a bisa.