Dia Internacional di Lenga Materno ta dia 21 di Februari 2018
Na Januari di e aña aki, gobierno actual di Aruba a decreta e aña aki como aña di Papiamento. Decreto No. MinOWD/83/18 167/18, fecha 18 di januari 2018.
Minister di Finansas, Asuntonan Economico y Cultura, Sra. mr Xiomara Ruiz-Maduro den un comunicado di prensa recién a yama Papiamento, “e weso di lomba di nos historia y nos desaroyo.”
Tambe el a haci un apelacion na tur hende pa ban busca e aña aki di 2018, como momento pa uni hunto p’asina duna realce y respet mereci na tur locual ta nos simbolonan di identidad.
Cultura ta yuda forma e caracteristica di un pueblo; cualnan ta nos escudo, bandera, nos himno y mas cu claro nos idioma Papiamento.
Papiamento ta nos medio di comunicacion bibo di tur dia. Riba 21 di Mei 2003 el a keda oficialisa pa Gobierno di Aruba. Aña escolar 2003, tabata e prome aña cu Papiamento a drenta Scol Secundario, banda di otro diferente materia.
Mester menciona esaki como un gran logro den nos Enseñansa.
E vehiculo cu a introduci ta e buki/metodo cu tin e nomber Cristal.
Cristal ta un piedra semiprecioso cu nos ta haya aki na Aruba na Sero Cristal. Cristal ta un piedra cu ora lus cay riba dje, ta lombra den tur sorto di color. Esaki ta representa e diferente facetanan di nos idioma. Cristal ta un piedra cu structura. Asina nos idioma tambe ta: bon structura!
Idioma Papiamento mes ta un bunita cristal interesante y dinamico!!
E aña aki 2018 ta Aña di Papiamento y pa cual motibo Departamento di Cultura Aruba (DCA) hunto cu Fundacion Lanta Papiamento (FLP) ta pone mas atencion na nos idioma Papiamento. Pa nos tur ta importante stimula e bon uzo di nos Papiamento etimologico y sigui dun’e atencion. Relaciona cu Dia 21 di februari di tur aña cu ta ‘Dia Internacional di Lenga Materno’, proclama pa UNESCO. E idioma Papiamento ta nos lenga materno y sigur importante pa sobrebibi y sigui existi pa generacionnan cu ta bini riba e islanan Aruba, Boneiro y Corsou cu hunto mas o menos 500.000 hende ta papia esaki.
Pa nos dushi Papiamento sigui existi nos mester papi’e, cuid’e, promov’e y stimula su bon uzo, su desaroyo bou di nos hendenan. Duna balor na dje pa e no muri y ta nos tur hunto como comunidad mester prepara nos mes pa e sigui existi. Nos idioma Papiamento ta un di e simbolonan nacional di identidad esencial cu ta forma parti di nos Herencia Cultural y cu ta e vehiculo mas uza como medio di comunicacion. Papiamento ta un idioma autoctono importante pa salvaguardia y duna mayor atencion riba Dia Internacional di Lenga Materno.
DCA tin 2 punto di prioridad den su maneho cultural, nan ta *Educacion den Arte y *Herencia Cultural y di dos, Documentacion y Digitalisacion di Herencia Cultural.
Ambos ta di vital importancia pa Papiamento! Educa herencia cultural e.o. e bon uzo di Papiamento, stimula esaki. E historia y documentacion di herencia cultural ta sosode den bon Papiamento! Tambe e documentacion di e historia di Papiamento, como e ta un di nos simbolonan di identidad di mas importante, sigur banda di otro simbolonan di identidad. Esey kier men cu tur cos ta ser splica na Papiamento, pero tambe ta splica e historia di Papiamento y cu nos idioma ta forma parti clave den nos historia y herencia cultural. Riba Dia di Lenga Materno ta importante pa nos pone enfasis riba cuida, promove y stimula su bon uzo di nos idioma Papiamento.
E app na Papiamento ta un ehempel di digitalisacion den cuadro di DCA su maneho.
E maneho tin como meta pa mantene e idioma bibo, su desaroyo di herencia cultural den documenta y digitalisa esaki ta pa sigura cu Papiamento ta keda bibo entre nos habitantenan pa tur generacionnan cu ta sigui.
Fundacion Lanta Papiamento lo bay tin nan Dictado Nacional pa tur edad riba 21 di februari 2018, Dia Internacional di Lenga Materno for di 7or pa 8or y mey di anochi na Biblioteca Nacional Aruba. Entrada gratis.
Departamento di Cultura Aruba y hunto cu Fundacion Lanta Papiamento ta invita pa mas hende participa na esaki y reta bo mes den conocemento di e bon uzo di Papiamento. Keda pendiente di informacion y e calendario di actividad relaciona cu 2018 Aña di Papiamento.
Desde awor nos di DCA ta bisa; “Pabien Arubianonan riba Dia Internacional di Lenga Materno”.