Diahuebs 24 di Augustus e ciudad di Amsterdam a duna e studiantenan di Aruba, Bonaire, Corsou, St. Maarten, St. Eustatius y Saba un caluroso bon bini. E studiantenan aki a yega Hulanda pa asina sigui cu nan estudionan. Otro luna nan lo cuminsa cu nan estudionan na nivel di MBO, HBO of Universidad. durante e recepcion, e ministernan Plenipotenciario y representantenan di e islanan tambe tabata presente.
Locoburgemeester Kajsa Ollongren a enfatiza ariba e e hecho cu e studiantenan Caribense a bira Amsterdammernan awo. E sra ta spera cu e studiantenan lo engrandece e ciudad cu nan storianan, experencia y nan personalidadnan. “Ta e hendenan ta haci Amsterdam e ciudad cu e ta awo. Y desde awe boso tambe ta pertenece na Amsterdam”.
Studia den exterior pa tur hende ta un stap hopi grandi. Pesey mes e idea di e recepcion ta pa ta un apoyo na e hobennan y pa trece nan den contacto cu e otro studiantenan, guia di studiantenan, asociación di studiantenan, organisacionnan social como tambe e bureau di stage di gemeente Amsterdam mes.
Potretnan cortesia di Beeldbank Amsterdam, Marco Keyzer.