Alumno nan di aña escolar 1976 – 1977 di St. Paulus School ta organisa un caminata di tres dia riba 23, 24 y 25 di april proximo. Ta trata di ex alumnonan entusiasma cu a uni pa recorda e dushi tempo cu nan a bay ‘Paulus School’, manera nan tawata yama e scol popularmente.
Cu esaki nan kier duna bek na San Nicolas, e bario di nan scol.
Na mes momento nan kier yuda conscientisa comunidad cu movecion ta saludabel. E ‘3Day 5K FUN WALK&RUN’ tur tres dia ta cuminsa y caba na St. Paulus School pariba di Joe Laveist Sport Park na San Nicolas. Inscripcion ta cuminsa entrante 6 di april na IBISA y cerca miembronan di comision. Ta pidi pa sigui e noticianan tocante e caminata via e pagina di Facebook. Esaki e comision a comunica diahuebs ultimo durante un conferencia di prensa hunto cu sponsor principal Aruba Bank.
Ta invita comunidad henter pa join, move y sinti bon, participando na e caminata di tres dia. Por inscribi na IBISA Playa y San Nicolas entrante dia 6 di april durante orario di oficina. Tambe lo tin oportunidad pa inscribi cerca miembronan di e comision via [email protected]. Participacion tur tres dia, mas un dry fit shirt ta costa Awg. 20,-. Por subi e facebook page @paulusschoolreunion pa mas detaye y fecha extra pa pago y pick up di t-shirt.
Rutanan
E ruta di e prome dia, 23 di april, lo ta: St. Paulus School – Jim Blue Jacketstraat – Otaheitistraat – Dr. Schaepmanstraat – Weg Kust Batterij – Kust batterij – Diamantbergweg – Juana Mortostraat – Nijhoffstraat – Hildebrandstraat – Pastoor Hendrikstraat –Jim Blue Jacketstraat – St. Paulus School. E di dos dia, 24 di april, ta cuminsa na St. Paulus School – Jim Blue Jacketstraat – Otaheitistraat – Sportparkstraat – Bellisimastraat – Isaak Wagemakerstraat – Weg Sero Preto – Caya Jose Geerman – Brasil – Bernhardstraat – Isaak Wagemakerstraat – Nieuwe Weg – Isaak Wagemakerstraat – Anglostraat – Otaheitistraat – Jim Blue Jacketstraat y ta caba na St. Paulus School. E di tres dia, 25 di april, ta cuminsa un biaha mas na St. Paulus School – Jim Blue Jacketstraat – Pastoor Hendrikstraat – Isaak Wagemakerstraat – Bernhardstraat B v/d Veen Zeppenfeldstraat – Lagoweg – Bernhardstraat – Stadhoudersstraat – Maria van Oranjestraat – Jan Van Nassaustraat –Pastoor Hendrikstraat – Jim Blue Jacketstraat y caba na St. Paulus School.
Gradici sponsornan
E comision ta haci uzo di e oportunidad pa gradici IBISA, Cuerpo policial y St. Paulus School pa e bon cooperacion. Tambe ta gradici sponsor principal Aruba Bank y co sponsors WEB Aruba, Setar, Total Services, Boogaard Assurantien y Bite! Communications pa nan tremendo contribucion. Zo gaat het goed, zo gaat het beter…
E invitacion pa participa na e 3Day Fun Walk&Run ta bay pa comunidad henter. Ta haci un yamada specifico na tur ex-alumno di Paulus school di
aña escolar 1976- 1977 pa join e caminata di tres dia aki hunto cu famia y conocinan. Ken ta corda canticanan ora di wandelmars ‘zo gaat het goed, zo gaat het beter…’ Tambe un yamada na tur ex- alumno di 76/77 pa keda pendiente pa un encuentro festivo caminda tur lo reuni y recorda e temporada ey. E encuentro lo tuma logra dia 4 di mei proximo. Sigui e pagina di Facebook @paulusschoolreunion pa keda na altura di tur informacion. Tambe por
manda un e- mail pa [email protected].