Skirbi pa Clyde Harms
Dia 29 di Januari Elsa Lampe Saladin, viuda di nos inolvidabel amigo Charlie Lampe, a sufri un hemoragia cerebral. Pa e nochi di 30 pa 31 di januari, el a hala su ultimo rosea y Aruba a perde un muhe ehemplar.
Elsa tabata un yiu ehemplar. Pa hopi aña el a cuida su mama cu tabata malo y tabata keda na su cas y Elsa a carga e cruz ey no cu resignacion, pero cu amor profundo pa su mama.
Elsa tabata un esposa ehemplar. Tempo cu Charlie a bira malo y cu e mester a coy cama prome cu el a bay laga nos, Elsa a cuid’e cu e mes amor cu nan tabatin pa otro durante e decadanan cu nan a gosa di nan matrimonio feliz. Diasabra ora cu Elsa bay su ultimo lugar di reposo, e lo ta drumi banda di su estimado Charlie den cementerio Masonico “Acacia”.
Elsa tabata un mama ehemplar. Elsa tabata un compas moral pa su famia. Mimi, Maki y Lissy ta legado di un mama cu a duna su yiunan e afecto, amor, cariño y cuido cu hopi ta desea di a ricibi di nan mama. Despues cu nan a bay biba riba nan mes, e rumannan y nan yiunan tabata bishita Elsa casi tur dia y Elsa tabata contento di prepara cuminda pa comparti cu tur.
Elsa tabata un anfitrion ehemplar. Pa varios aña ami tabata miembro di un grupo di amigo cu tabata reuni na cas di Elsa cu Charlie. Semper Elsa cu su personalidad alegre y positive tabata percura pa tur hende sinti nan mes na cas. Semper e tabata sa co pa crea un ambiente di cordialidad den e grupo.
Elsa tabata un amiga ehemplar. E tabata un amiga den bon y den malo. Su amigo y amiganan semper por a conta riba dje. E reaccion di shock di su amigo y amiganan na e noticia di e atake y e fayecimento derepente di nan amiga Elsa ta muestra di e afecto, cariño y amor profundo cu nos tur tin p’e. Mescos cue e famia, nos tambe ta sufri e dolor y tristeza di a perde un ser keri manera Elsa.
Elsa por a bay laga nos, pero e recuerdonan di Elsa lo ta cu nos te dia cu nos tambe lo laga e bida aki.
Na Mimi, Lissy, Maki y nan famianan hopi forsa. Cu Elsa drumi dushi den brasa di nos Señor. [email protected].