Diabierna durante huramentacion di parlamento nobo, un di e personanan cu ta drenta parlamento pa prome biaha ta Sr. Allan Howell, candidato ariba lista di POR. E ta amplia mas ariba su experiencia aki y kico ta su expectativanan pa cu e experiencia aki.
Ya den curso di siman, ya caba Sr. Howell tabata haya felicitacion pa cu su posicion nobo como Parlamentario. Sr. Howell ta reitera cu e no a tuma e decision door di problema personal cu e tabata tin cu e partido, pero a base di un vision cu e tabata tin, pa e por a sirbi e comunidad. Caminda cu el a mira cu a dun’e espacio pa el a sirbi su comunidad, a reconoce su talento y su cualidadnan, e sed y hamber cu e tin pa traha pa Aruba, eynan e ta.
Diabierna, por a mira cu Dios Tata a cumpli cu su deseo y a wak cu e tin gana di berdad, pa e sigui sibri su comunidad. Tabata 23 aña pasa cu el a huramenta cu e lo sirbi su pais, cu alma y cuerpo, como un polis, cu cualke momento ta dispuesto pa entrega su bida pa sirbi su pais. Y diabierna, un biaha mas e ta huramenta como un sirbido di pueblo, den e organo mas halto den e pais, y pa por draag bij, tur e experiencia cu e tin di Cuerpo Policial, caminda cu e por bin cu leynan y brinda e siguridad maximo pa pueblo.
Hopi hende ta kere cu Medio Ambiente ta un cartera facil, pero esey ta leu di ta berdad. Den su opinion personal, si tin wes’i lomba, pa tuma decisionnan, sin worry ken ta amigo of ken ta sostene partido, lo yega na un solucion pa e dump. E dump no tin un problema grandi, pero mester un gobierno cu wesi lomba, un minister cu kier haci un cos, pero ministerraad ta dicidi otro. Mester bin cu solucion berdadero pa cu dump y cu su conocimento ariba e tema aki, sigur e lo por yuda aporta na yega na un solucion berdadero pa cu e problema di dump.