KRALENDIJK, Boneiro – Aki ta sigui un resumen di algun noticia Policial di Boneiro di 7 October te cu 11 October 2016.
Ladronisia di trahenan di baño
Riba djaweps 7 di òktober a detené tres mucha muhé menor di edat en konekshon ku ladronisia di trahenan di baño for di un negoshi situá na Kaya Kòrsou. Fiskal Ouksiliar a interogánan den presensia di nan mayornan i despues laga nan bai.
Aksidente riba Kaya Neerlandia
Riba djabièrnè 8 di òktober alrededor di 12 or di mardugá un aksidente entre dos outo a tuma lugá riba Kaya Neerlandia. Outo number 1 a kore muchu duru den un bògt i a bai dal den e outo ku tabata biniendo for di direkshon kontrario. Tur tres okupante di outo number 2 a keda herida. Ambulans a transportá okupantenan di tur dos e outonan pa hospital pa kòntròl i tratamentu médiko.
Aksidente ku skuter
Riba djabièrnè 8 di òktober pa mas o ménos 3.30 or di mardugá un aksidente ku un skuter a tuma lugá riba Kaya Nikiboko Suit. Probablemente e shofùr a pèrdè kontrol i a kai. Personal di ambulans a kontrol’é.
Detenshon
Riba djabièrnè 8 di òktober a detené un hòmber di inisialnan J.R.N.T. den Kaya Grandi en konekshon ku insulto i menasa di ámtenarnan den funshon.
Ladronisia na sitio di buseo
Riba djaluna 10 di òktober a drenta keho di ladronisia di un iPhone kolo pretu i sèn kèsh. E ladronisia a tuma lugá entre 2.30 or i 3 or atardi ora un pareha tabata snòrkel i e artíkulonan tabata sin supervishon den nan tasnan di baiskel. Ta investigando e kaso.
Kiebro den kompleho di sine
Entre djadumingu 9 di òktober alrededor di 11 or anochi i djaluna 10 di òktober alrededor di 9 or di mainta a kibra drenta den e edifisio di sine situá na Kaya Katwijk. Deskonosínan a bai ku entre otro e kaha di sèn konteniendo sèn kèsh, vários chukulati i bòternan di bebida. Tambe nan a tira e edifisio ku webu. E kaso ta bou di investigashon.
Ladronisia di skuter
Riba djamars 11 di òktober a drenta keho di ladronisia di un skuter. E skuter kolo shinishi/pretu di marka Kymco Agility, numerá MF-126, tabata stashoná na un kompleho di apartamentu situá na Kaya Playa Lechi. E ladronisia a tuma lugá entre djaluna 10 di òktober pa mas o ménos 9 or di anochi i djamars 11 di òktober pa mas o ménos 6.45 or di mainta. Ta investigando e kaso.