PHILLIPSBURG- Sint Maarten ta haya un tik riba su dedenan for di minister demisionario Plasterk (Asuntonan di Reino). E gobierno di e isla ta nenga, contra di tur aspraak, pa instala un “camber di integridad) pa asina combati corupcion y pa e motibo aki ta impone un Algemene Maatregel van Rijksbestuur. E minister kier obliga e isla di haci esaki. For di rapportnan por conclui cu corupcion, soborno y “vriendjespolitiek” ta forma parti di e bida diario di e comunidad. Asina tambe e gobierno di e isla.
E binida di un asina yama “Integriteitskamer” lo mester pone un fin na tur esaki. Un institucion asina lo por haci investigacionnan relaciona cu abuso, haci denuncia y duna conseho obligatorio na e gobierno di St. Maarten.
Segun Plasterk awo ta tempo pa bin cu medidanan mas fuerte. “Minister President y e Minsiter di Husticia a firma e acuerdo, pagina pa pagina. Awo nan no ta cumpli cu loke nan a firma. Y esaki no por, segun Plasterk. E minister ta spera cu e isla recapacita y cu di su mesun boluntad e instala e comision aki. Raad van State ainda lo mester studia e proposicion aki di Plasterk.