Cosnan ta birando dia pa dia mas tenso den NV Elmar y sindicatonan Alfast y STA lo uni pa por yega na un solucion. Ta conoci cu basta tempo cu tin un situacion tenso entre sindicato STA y actual director di NV Elmar, Sr. Robert Henriquez.
Segun Sr. Diego de Cuba, di sindicato STA, nan lo bay haci un peticion na minister encarga cu NV Elmar, Sra. Evelyn Wever- Croes, pa asina pidi pa un otro mediador, cu no ta esun oficial, cual ta Sr. Anselmo Pontilius, pa por interveni den e problema aki.
Recientemente sindicato STA conhuntamente cu e delegadonan NV Elmar y Sr. Eddie Briesen, den representacion di Bureau di Minister President, a reuni cu e directiva di NV Elmar na oficina di mediador di gobierno, a pesar di cu e reunion no a dura mucho largo.
Aki den un biaha mas a ratifica e carta cu a wordo dirigi na minister president unda cu mayoria absoluto di mas o menos 90% di e trahadonan, cu ta cay bou contracto colectivo a firma cu nan no kier Sr. Robert Henriquez como director di compania Elmar mas.
Segun Sr de Cuba, den e reunion aki Sr. Anselmo Pontilius, mediador di gobierno a bin cu’n protocol di aña pasa cual sindicato STA a nenga di fima. Niun di dos sindicato, ni Alfast y ni STA no tin confiansa mas den mediador di gobierno, pa cual nan ta pidi pa un otro persona tuma e rol aki over.