Tur siman tin algo nobo di cualkier droga, y tin biaha FADA ta hay’e for di e mesun alumnonan na scol. Awo ta tin hasta droga den forma di buscuchi. Sra. Ruthline Arends di FADA ta amplia.
Constantemente y tur siman tin algo nobo den tur sorto di forma y hopi biaha FADA ta haya e informacion di e mesun muchanan di scol cu ta mantene hopi riba social media y internet, pero FADA lo keda informa y duna informacion manera semper na e comunidad.
Esunnan cu ta traha e droganan tin cu keda desaroya cada biaha door cu polis ta garanan cu un sorto di droga anto nan lo bay cambia nan pa un otro pa por scapa, den caso aki di e buscuchi y mester keda bay cu nan tambe pa no keda atras y pa ta na altura di e peliger pa por trece e informacion aki.
Ta conoci cu por traha bolo di marihuana y segun Sra. Arends, e ta algo cu ta bay keda sucede, tur siman tin algo, siendo cu tambe na nivel internacional nan a cuminsa saca cannabies di e lista di droganan y DEA tambe ta bezig pa saca marihuana di e lista di droga, unda expertonan a cuminsa considera den un par di tempo esaki no ta considera un droga mas manera semper.
Pero na Aruba e tema di marihuana cu nan kier legalisa, riba e punto aki FADA ta purba di mantene su mes aleha di e decisionnan aki cu ta decisionnan politico, pero e trabou ta sigui y ta informa pueblo unda cu tambe ta wak e researchnan y mester tin un diferencia entre bon cu malo y FADA ta keda riba esey.
Den caso si por mira e estadisticanan y cifranan cu ta mustra cu Cannabies ta un problema grandi actualmente na Aruba, manera cu tabata considera como e di prome step pa bay den droganan mas pisa despues, e pensamento di FADA riba esaki siendo cu nan ta hopi den contacto cu e hobennan, a bisa cu en berdad uzo di marihuana ta un problema basta pisa entre nos hobennan y ta alarmante.
Tin casonan hasta di muchanan di 4 cu 5e klas depende di e caso, cu a bisanan cu na cas nan tin marihuana cerca di nan, of cu nan a yega di purba caba y por ta antes tabata tende di esaki na un edad halto pero awe dia e edad a baha, anto semper mester wak ki daño por haci toch, unda cu nan a bisa hasta cu marihuana ta bon y tin hopi research riba esaki.
Mescos cu sigaria cu hende ta bisa cu ta daña pulmon, marihuana ta keda mes cos siendo cu tambe ta inhala huma y e otro efectonan cu tin, y ta keda traha hopi cu research di Europa y Merca, pero semper ta keda na criterio di cada hende con ta tuma e research aki.
Por ultimo Sra. Rulienne Arends di FADA a bisa cu nan ta no ta focus riba e decision cu por a wordo tuma y laga esey na esunnan encarga, y nan ta keda haci su trabou anto e ora un desicion a wordo tuma e ora tur e instancianan concerni mester sinta reuni y bin cu un plan y tanten ta keda informa di e parti negativo di esaki na e comunidad.