ALEPPO, Siria – E evacuacion di miles di civil di e ciudad sitia di Aleppo, a stop e mainta di diabierna y tin duda riba e continuidad di e operacion, e Comite Internacional di Cruz Cora.
Personal di CICR, trahadonan Sirio di Mita Luna Cora y representantenan di e Organisacion Mundial di Salud a ricibi orden pa sali for di oost di Aleppo.
“E evacuacionnan a stop,” vocero pa Medio Iriente di CICR, Ralph El Have, a bisa CNN.
“Nos ta spera cu e partinan yega na un acuerdo pa nos por sigui cu e evacuacion.”
E activista Mahmoud Raslan, cu ta dentro di Aleppo, a bisa CNN cu nan tabata cerca di e zona controla pa e rebeldenan, ora cu e violencia a start.
“E evacuacion a wordo suspendi pa e regimen y e regimen Sirio tabata disparando awo na e punto di entrada, uzando makinaria pisa,” el a bisa.
“Un avion di combate ta den shelo awo y e regimen Sirio ta purbando di avansa riba e brug al-Sendyanah. Hendenan ta hopi spanta.”
E activista di Aleppo Media Center a atribui e suspension di e evacuacionnan na milicianan Irani, kendenan a bisa cu nan ta dirigi pa e districto di Sukkari, oost di Aleppo, cu un intenso tiroteo.
Te cu 9000 persona a sali for di e ciudad sitia den nuebe convoy desde diahuebs, incluyendo 108 herido, segun medionan estatal Ruso y Sirio.
Pa hopi, nan destino lo ta e provinci di Idlib, controla pa e rebeldenan y probablemente e proximo obhetivo di e regimen di Bachar al Asad.
Un activista cu ta traha dentro di e ciudad a papia cu reporteronan di CNN diabierna, bisando cu e no tabata sigur si su yiunan por bolbe bek Aleppo algun dia.
“Nos a spera cu e comunidad internacional y Nacionnan Uni lo castiga e criminalnan y no e vicimanan (e pueblo). Pa desgracia, e castigo tabata pa hende. Nos a wordo desplasa di nos tera,” el a bisa.
“Honestamente mi no sa si nos por bolbe bek algun dia na nos tera, of si nos ta bay tin e mesun destino di e Palestinonan.”
Fuente: CNN en Español