ALEPO, Siria – Cu tiro den aire y e zonido di e pitonan di auto a inunda diahuebs e ciudad Sirio di Alepo pa celebra su “reunificacion”, manera cu e habitantenan di e districtonan west di e ciudad, ta afirma.
Segun cu EFE por a constata, tabata tin tiro den aire den zonanan residencial di e poblacion, tras di e salida di e ultimo tanda di e rebeldenan oost di Alepo.
E comandancia Supremo di e Forsanan Arma Sirio a anuncia diahuebs den un comunicado cu e localidad di Alepo ta liber di “terorista” y a proclama e restablecimento di e “siguridad”.
Un fuente na Alepo a bisa Efe cu e fase final di e salida di e rebelde y su famianan di e ciudad a completa despues cu e ultimo cuater autobusnan cu evacuadonan a bandona e poblacion.
Anteriormente, television oficial Sirio a informa cu e ultimo cuater vehiculonan a wordo evacua di e districtonan asedia oost di Alepo a bandona e zona sitia y a crusa e bario di Al Ramusa, bao di e control di autoridad.
E proceso di evacuacion a cuminsa diahuebs ultimo y a sufri varios interupcion.
Segun e Comite Internacional di Cruz Cora, cu a facilita e evacuacion, por lo menos 34 mil persona a sali di e districtonan sitia na Alepo desde 15 di December ultimo.
Nacionnan Uni ta calcula cu entre 35 y 40 mil persona a bandona e asedio di Alepo, den e direccion na zonanan rural di e provincia homonimo y e region bisiña di Idleb, controla casi totalmente pa insurgentenan.
Fuente: NTN24