Pa esunnan cu ta gusta keda den condicion, organisadonan di Boulevard Loop ta anuncia cu ainda nan tin 80 cupo disponibel pa e caredanan di diabierna, Dia di Rey. Esunnan cu ta interesa por pasa libremente na APA, diahuebs for di 4 or y 30 di atardi te cu 7 or y 30 anochi.
Manera ya ta un tradicion, e Boulevard Loop semper a ser teni en conexion cu e celebracion rond di Dia di Rey esta 27 di april. Den pasado esaki tabata Dia (Aña) di La Reina, 30 di april, organisa pa varios aña door di Oranje Vereniging, bou guia di Sr. Jos van der Schoot, den feliz memoria hunto cu ayudo di e conocido comerciante di Sport Caribe, Sr. Harry Jansen kende tabata e iniciado di e prestigioso Boulevard Loop.
Den su inicio ta masha poco persona tabata participa na e Boulevard Loop pero mirando e interes den nos comunidad cu a bira mas consciente di haci movecion y ehercicio e careda a bira uno sold out, pues e cantidad di participante a sigui crece. Ya pa di dos aña aki e organisadonan esta Aruba Triathlon Association lo tuma alrededor di 600 persona pa participa na esaki. Pa varios aña e ruta di Boulevard Loop a keda uno mescos unda e recorido di 10km lo inicia na Malmok y termina na Aruba Port Authority. Mas cu claro debi na e popularidad algun coredo for di exterior lo bini Aruba pa participa na e prestigioso careda aki. E di 58 edicion di e Boulevard Race lo ta diabierna 27 di april proximo cuminsando pa 5.30 di atardi.
Mester bisa tambe cu varios coredo femenino y masculino elite di Aruba ya caba a confirma nan participacion mientras no por laga afo e fiel ekiponan di coremento na Aruba manera Aruba Malmok Runners, 297 Runners Aruba, Running Princess Aruba, Good 2 Be Active, ADRA, i-Run Aruba y Run for Your Heart como tambe TMT y Swikers Tri. Lo tin bus disponibel na Aruba Ports Authority pa hiba e atletanan na e start. E busnan lo sali 4:00, 4:15 y 4:30 pm.