Aruba Hotel and Tourism Association (AHATA) mas of menos un luna pasa a ricibi peticion pa haci un donacion special na Scol pa Ofishi. Docentenan ey a ripara cu falta cierto hermentnan esencial den e cushina pa studiantenan. AHATA a dicidi di contribui cu henter e lista di deseo di e scol, den forma di un donacion significante di tur tipo di material pa haci cu por duna lesnan na un forma mas profesional, mas eficiente y mas efectivo.
AHATA, siendo e asociacion di hotel y turismo di nos isla, ta determina pa inspira mas hoben y motiva nan pa sigui den e ramo culinario. Aruba como destinacion turistico ta hopi conoci pa su segmento di “Food and Beverage” di calidad halto y variedad grandi. Tin hopi oportunidadnan interesante den e HORECA pa empleo riba tur nivel, for di cook helper pa chef, como tambe como empresario, for di e negoshi “micro” di benta di cuminda, te na restaurant di servicio completo.
E isla tin hopi talento hoben cu simplemente mester ta exponi na e placer di traha den cushina y pa medio di training basico di tecnica nan y habilidad nan uzando e materialnan corecto, lo yuda e alumnonan pa ta riba e bon caminda pa sigui studia, forma un carera y contribui na e pilar number 1 di nos economia.
Vanessa Rasmussen – Lew Jen Tai, den su calidad di “Administrative Manager” na AHATA, a bishita e scol pa haci entrega di e materialnan na e docente, Rachel Singodjojo y su studiantenan. El a laga sa cu esaki tabata un bon oportunidad pa yuda e studiantenan pa introduci nan un poco mas na e mundo culinario.
Ta cu alegria, placer y hopi orguyo AHATA ta contribui na e carera academico di e hobennan di Scol pa Ofishi.
Juffrouw Singodjojo a splica cu e ta un docente nobo na e scol y a ripara cu falta algun material pa haci e experiencia di e studiante uno significante y productivo pa desaroya miho, pa cual a prepara un lista di deseo. Scol pa Ofishi, e docente y su studiantenan, a keda hopi contento y gradici cu nan deseo porfin a bira un realidad!
Aruba Hotel and Tourism Association a entrega diferente tipo di cuchiu manera cuchiunan pa filet y paring, cuchiunan cu e stempel di cumplimento cu reglanan di HACCP, stacionnan di mesa di stainless steel special pa restaurant, diferente planki pa corta pisca, carni, berdura y fruta, apron, pechi di chef, serbete di cushina, forki, cucharanan special, tayo, copi y otro cos di kibra nan necesario. AHATA ta desea e studiantenan di Scol pa Ofishi hopi exito y cu nan por topa bek na momento di nan graduacion y ora celebra nan exitonan den nan futuro carera.
Na September 1965 a funda Aruba Hotel Association y na 1987 a bira Aruba Hotel and Tourism Association (AHATA), cu awendia ta conta cu 90 compania miembro. Su miembresia ta varia for di hotelnan grandi, timeshare, operadornan di tours y companianan grandi y chikito den e sector. E rol primordial di AHATA ta pa proteha, dirigi y influencia e industria turistico di Aruba door di sigura cu sector publico ta aloca fondonan di “Room Tax” den forma apropia, ta inverti e suma aki efectivamente y ta ehecuta plannan di mercadeo den forma corecto pa aumenta “rev-par” y e suma cu cada turista ta gasta ora ta di bishita riba nos isla.