E agentenan policial cu ta wordo teni responsabel pa e morto di Mitch Henriquez a aparece ayera mainta pa prome biaha dilanti Hues. Fiscal, Ministerio Publico, abogado di e agentenan y Corte a discuti si lo mester interoga mas hende of si un investigacion extra lo ta necesario.
E identidad di e agentenan no ta conoci. Durante tratamento di e caso den e sala di Corte cu extra siguridad, e agentenan a sinta den un hoki apart pa garantisa nan anonimato.
E homber Arubano, Mitch Henriquez di 42 aña a muri na Juni 2015 door di brutalidad policial durante su aresto. E tabata di vakantie na Hulanda y a bay e concierto Night at the Park den e Zuiderpark na Den Haag. Henriquez a wordo aresta door di cinco agente despues cu el a grita cu e tabata tin arma cun’e. Su morto a causa disturbionan durante varios dia den e Schilderswijk na Den Haag.
E dos agentenan cu mester parece dilanti Hues, ta wordo acusa di maltrato cu tabata tin morto di un persona como consecuencia. E otro tres acusadonan a tene nan mes na e regla cu polis mester atene nan mes na dje, ora di uzo di violecia.
E cinco agentenan ya caba a haya castigo disciplinario despues di un investigacion interno. Dos agente a haya suspension condicional y no mag di carga arma pa un aña largo. Dos otro a haya un waarschuwing por escrito. E di 5 a wordo acusa di incumplimento di deber. Retiro no tabata al caso, segun e Hefe di Cuerpo di es tempo ey.
Famianan di Mitch Henriquez no ta di acuerdo cu e castigonan leve aki. Nan kier pa tur cinco agente wordo persigui door di Ministerio Publico. Decision di Hues no ta wordo spera prome cu comienso di e proceso, cual lo tuma luga na April.