Agentenan policial den caso di Mitch Henriquez ta bay den apelacion

0

DEN HAAG, Hulanda – E agentenan cu tabata envolvi den e aresto fatal di Mitch Henriquez lo bay den apelacion contra di nan sentencia. Esaki a wordo informa door di nan abogadonan. Aña pasa e agentenan aki a wordo condena na un castigo condicional di 6 luna, cu un periodo di prueba di 1 aña.
“Ambos agente no ta di acuerdo cu e sentencia. Nan defensa ta di opinion cu nan mester a wordo declara liber di tur acusacion”, segun e abogado di e agentenan.
Henriquez a fayece un dia despues di a wordo deteni na un festival di musica na Den Haag, na final di Juni 2015. En total tabata tin 5 agente policial envolvi pa a contene Henriquez di 42 aña pa asina el a wordo aresta. Dos di e agentenan a wordo persigui penalmente, door cu nan a haci uzo di forsa extremo durante e aresto.

Fout grandi
Den su sentencia e hues a bisa cu e polisnan “a comete un fout grandi, cu consecuencianan grave”. Pero si el a mustra ariba e situacion inusual di e caso. “Si tin un peliger e ora e ciudanano por gewoon cana bay. Pero un polis no”.
E dos agentenan durante henter e tratamento di e caso tabata apart di e publico y a keda anonimo den e sala di Corte na Schiphol. Nan a wordo yama DH01 y DH02. Nan a wordo proteha ya cu despues di e aresto nan famianan tabata victima di menasanan den nan contra.

Disturbio
E morto di Henriquez e tempo ey a zorg pa disturbionan den e Schilderswijk na Den Haag. Ministerio Publico si a haya cu e agentenan tabata culpabel, pero ta haya cu nan no tabata mester a wordo castiga. No ta conoci ainda di Ministerio Publico tambe lo bay den Apelacion.

Comments

comments