Aruba Airport Authority N.V. (AAA) a tuma nota di un articulo riba un website di noticia cu e titulo “Fever den cura di airport”. AAA kier aclarea e situacion de inmediato pa kita tur speculacion of inkietud inecesario cu esaki por a causa.
Den cuadro di aeropuerto su plannan pa combati parha (wildlife) riba tereno di aeropuerto, tin varios accion cu aeropuerto ta tumando pa preveni cu parhanan ta subi riba tereno di aeropuerto causando peliger pa e mundo di aviacion.
Si un parha drenta den motor di un avion, esaki por tin consecuencia fatal pa e pasaheronan abordo di e avion. E lo tin un impacto grandi tambe riba turismo di Aruba, sin conta e gastonan halto cu un degracia aereo ta bin cun’e. P’esey AAA como operador responsabel di Aeropuerto Internacional Reina Beatrix ta tuma pasonan di siguridad pa core cu tur bestia cu lo por ta un peliger pa avionnan cu ta subi y baha na aeropuerto.
E articulo ta mustra tambe un video di un pick-up cu ta sacando/lantando stof. E empleado ta specificamente bezig ta core cu e parhanan for di riba tereno di aeropuerto. Aeropuerto ta purba diferente forma pa por core cu e parhanan y esaki ta un di nan cu recientemente ta mustra cu ta haci e trabou.
AAA ta consciente cu pa e publico pafo di aeropuerto esaki lo por mustra manera algo inusual of contra reglanan di seguridad, pero kier sigura cu na ningun momento niun hende ta coriendo peliger, al contrario, esaki ta pa yuda evita cu nos ta pone bida di hende den peliger.
Aeropuerto ta trahando simultaneamente riba diferente alternativa pa por sigui garantisa e siguridad di tur nos aerolineanan y usarionan di aeropuerto
AAA ta aprecia cualkier feedback y comentario, pero na mes momento ta pidi tur miembro di prensa pa den futuro pa verifica cu AAA cu ta opera aeropuerto si en berdad loke ta sosode riba tereno di aeropuerto ta permiti of no, pa asina no causa panico innecesario bou di comunidad cu ta hopi atento di aeropuerto.