Aruba Airport Authority N.V. (AAA) den un forma festivo a yama bonbini na e aerolinea Dominicano “Air Century” na Aruba dia 3 di Juli 2018.
Air Century ta un aerolinea Dominicano funda na 1992 door di e CEO y Presidente actual, e piloto y capitan Sr. Omar Chahin Lama; cu base di operacion na Aeropuerto Internacional Dr. Joaquín Balaguer (JBQ), na e ciudad di Santo Domingo, Republica Dominicana.
Na comienso Air Century tabata ofrece servicio di excursion y di propaganda aereo. Despues cu e flota di avion a crece y diversifica, e aerolinea a cuminsa opera vuelonan charter cu servicionan di charter corporativo y transfer di crew, cu un market share di 90% den e region Caribe. Subsecuentemente e aerolinea a desaroya rutanan domestico regular pa rutanan manera di Santo Domingo pa Punta Cana, Barahona, Santiago y Puerto Plata. Air Century ta ofrece su clientenan transporte aereo di calidad halto, sigurando vuelonan safe cu avionnan cu ta pas cu e demanda di e mercado.
E vuelonan pa Aruba lo wordo haci cu avionnan tipo Saab 340. E schedule di vuelo ta consisti di vuelonan pa Aruba riba Diamars y Diadomingo, mientras cu vuelonan pa Republica Dominicana lo ta disponibel riba Diamars, Diaranson y Diadomingo.
AAA su Chief Commercial Officer, Sra. Barbara Brown tabata contento pa yama e aerolinea Dominicano bonbini: “Cu e vuelo nobo ofreci pa Air Century, nos por ofrece nos pasaheronan mas opcion di calidad pa y for di Republica Dominicana y pa e otro destinacionnan den e region di Caribe. Nos ta spera di por conta riba un relacion extenso cu lo desaroya den mas frecuencia den futuro.”
Air Century ta ofrece vuelonan charter y otro servicio den e region di Republica Dominicana, Caribe, Sur America y Noord America. Por cumpra ticket pa biaha na www.aircentury.com of na e agencia di biahe di bo escogencia.