Mirando cu no ta tende nada di Gobierno y no ta mira solcuion den e asunto, e detenidonan lo keda perhudica den e caso aki den e caso cu na mes no por paga un abogado segun Abogado Jose Figaroa, kende a splica kico lo bay sosode for di awo padilanti.
Manera ya menciona, esnan cu mas lo wordo perhudica ta e sospechosonan den un caso. Hendenan cu ta wordo deteni. Na momento cu wordo deteni, esey no ta nifica cu bo ta culpabel di algo. Pesey tur hende tin derecho di un defensa. Lamentablemente e defensa ey, di parti di un abogado pa casonan piket na e momentonan aki, no tin, ni tampoco lo bay tin te na momento cu lo bay tin un solucion. E ta fastioso, pero di un otro banda, manera cu a indica den e conferencia di prensa ultimo, esey ta depende hopi di Gobierno mes.
Den e caso cu Gobierno no duna atencion, segun abogado Figaroa, pa awor aki ta mantene e caminda di accion. Si esey mester intensifica lo mester papi’e atrobe. Ta un discusion cu tin cu tuma luga tambe cu tur e miembronan di e Orden di Abogado. Loke tin awor aki cu a wordo palabra cu tur miembro, ta en todo caso e accion di ultimo ocho dianan aki y e proximo ocho dianan cu ta bin. Si acaso den e proximo ocho dianan aki tampoco no resulta nada satisfactorio, e ora ey, lo bay bek na mesa cu e miembronan pa wak kico lo ta e siguiente pasonan pa tuma.
Segun Figaroa, probablemente na momento cu un detenido yega na zitting y esey lo dura, pasobra for di momento cu un sospechoso wordo deteni y te na momento cu e caso bin dilanti, e por tarda algun luna. Pero na momento cu e casonan wordo trata, un di e preguntanan sigur cu lo bin dilanti, ta si e defensa a tuma luga manera mester ta. Si tabata tin un “huicio husto”, manera cu e ta wordo nombra den ley. E pregunta ta tambe cu tin cu haci cu na momento cu un abogado cu ta wordo paga door di Gobierno no ta wordo paga den un forma husto pa su trabao, con leu como Gobierno, bo no ta haciendo un impresion tambe den e “huicio husto”. Si bo haci un comparacion, tin un Ministerio Publico cu si ta wordo paga manera mester ta pa persigui un sospechoso y tin un abogado na e otro banda cu no ta wordo paga manera mester ta door di Gobierno pa hiba e defensa. E ora tin cu cuestiona, con leu e balanse eynan tambe ta hinca den otro, segun abogado Figaroa.