WASHINGTON/AMSTERDAM- E abogado Huandes, Alex van der Zwaan, vincula na e presidente Donald Trump a wordo deporta pa Hulanda. E ta e prome persona condena pa e conspiracion Ruso despues di a cumpli un pena di un luna den prizon den teritorio Canades.
Funcionarionan di Servicio di Inmigracion y Control di Aduana (ICE), a informa EFE cu e abogado a wordo repatria diaranson pa Hulanda. El a keda cera pa un luna largo pa a gaña FBI tocante su contactonan cu e campaña di e presidente actual di Merca.
E Hulandes, cu tin cu paga un boet di 20 mil dollar, a yega Hulanda diamars y ta na disposicion di autoridadnan di e pais. Esaki despues di un dia cu el a sali for di e prizon federal di Allenwood, na Pennsylvania, y a wordo traslada pa e sede di ICE.
Van der Zwaan, di 33 aña y yerno di un oligarca Ruso, lo mester keda dos luna mas di huisarest. Despues e lo por bolbe London, unda cu e ta biba cu su casa y ta sperando e nacemento di su prome yiu, na augustus.
E abogado condena, na februari a declara su mes culpabel di e gaña FBI, y e oficina di e fiscal special cu ta investiga e trama Ruso, Robert Mueller, durante un interogacion celebra dia 3 di november 2017.
E ciudadano Hulandes a purba e tempo ey di sconde for di e investigadornan su contacto cu dos di e figuranan di e conspiracion Ruso: e ex hefe di campaña di Trump, Paul Manafort, y su “number dos”, Rick Gates, ambos acusa di varios delito, entre cual ta inclui labamento di placa.
Mueller desde mei 2017 ta investigando gobierno y e posibel lasonan entre miembronan di campaña di Trump y Kremlin, di manera independiente.
Agencianan di inteligencia di Merca ta acusa Kremlin di a mete den e eleccionnan di 2016.
Fuente: EFE