Diabierna e mandatario di Salubridad Publico, Sr. Dangui Oduber, despues di a haya aprobacion di Conseho di Minister, a apunta dos persona, cual uno di e departamento mes y e otro ta un abogado, pa dirgi DVG. Ta trata aki di e abogado mr. Sven Faarup y Sra. Joan van Heyningen, un Jeugd Arts, hefe suplente di Jeugd Gezondheid Zorg (JGZ) na DVG.
Despues di a manda e Director di Directie Volksgezondheid Aruba (DVG), drs. Jerry Staring cas pa investigacion, Minister Dangui Oduber a anuncia cu lo institui un “Management Team” temporario pa guia e departamento mientras ta investigando e kehonan cu personal tin contra Staring. E suspension di Sr. Staring ta basa ariba e conseho di Departamento di Recurso Humano (DRH), pa asina cuminsa cu’n investigacion transpartente den dicho departamento.
E minister y Sr. Staring a sinta na mesa, pa asina duna Sr. Staring e oportunidad pa reacciona ariba e acusacionnan aki. Pero esaki tabata envano, ya cu Sr. Staring no a haci esaki.
E Management Team aki lo bay dirigi Dienst Volksgezondheid Aruba (DVG) temporalmente, te ora cu e investigacion contra drs. Jerry Staring, keda cla.