Compania Arubano di Petroleo (CAP) ta hopi satisfecho cu ya caba a cuminsa cu e fase di exploracion di gas y petroleo den lama rond di Aruba. “Mi ta contento cu tog despues di basta tempo nos tin actividadnan nobo off-shore di Aruba. No solamente mirando e area bieu cu a wordo explora den pasado unda nos lo bolbe tira un bista, pero tambe un area nobo, un area frontier, unda cu nos ta pone hopi speransa cu por tin desaroyonan faborabel pa nos tur”, asina Armando Curet, director di Compania Arubano di Petroleo a manifesta.
Mester tene cuenta cu ta trata di un trabao cu cierto incertidumbre semper na e fase preliminar of di reconocimento. Recientemente a cuminsa cu e fase di adkisicion sismico over di un parti grandi di e area off-shore di Aruba. E area mas grandi ta e area pa noord di Aruba cual ta un area nobo, el a bisa.
Segun Curet tin hopi expectativa den e trabao nobo aki cu ta cuminsando. A laga sa cu a reuni cu diferente stakeholder, principalmente cu esunnan envolvi den loke ta flora y fauna. Mas tanto posibel ta purba di yega mas cerca posibel di loke ta nan preocupacionnan.
Tabata tin un bon entendimento entre ambos partido y a scucha otro bon. Tin diferente areglo cu a wordo haci y ainda na e momentonan aki tin combersacionnan cu e gruponan pa tene mas tanto cuenta posibel cu loke a ser treci dilanti.
Un di esaki tin di haber cu e mamiferonan. A laga sa cu abordo di e barco lo tin observadornan y expertonan den e tereno aki y REPSOL mes a ofrece e posibilidad pa un representante di e fundacion di Mamifero na Aruba ta abordo pa comparti su conocemento cu e resto di tripulante nan y pa sigura cu mamiferonan den e zona no core ningun peliger. Banda di esaki tambe tin e piscadonan, e hendenan di watersports y cu tur e gruponan aki a hiba reunion. Ta bay tin mecanismonan di informacion diariamente y na tempo pa duna cu anticipacion datonan cu ta di importancia pa nan durante e adkisicion sismico, Armando Curet a enfatisa.
CAP y REPSOL ta hopi optimista, pero tambe cauteloso ya cu tin hopi cos cu ta desconoci pa loke ta e geologia di e area. Tin algun informacion y e fase aki ta pa purba di haya sa mas tanto posibel kico nan no sa ainda.
“Despues di esey cada biaha bo ta tuma un decision, si nos ta sigui mas of no (…). Nos ta spera claramente mirando e importancia, cu si bo tin bo mesun recursonan di energia, di petroleo con importante esey ta”, el a declara.
Armando Curet a finalisa bisando cu nan ta spera e resultadonan cu hopi optimismo.
Loading ...
