Sint Eustatius: Djaluna ku a pasa dosentenan na Sint Eustatius a risibí nan sertifikado di “Cambridge English”durante di un seremonia festivo na Gwendoline van Putten School. Ku e entrega di e sertifikadonan aki a e dosentenan a finalisá un trayekto di rekapasitashon di 18 luna. E rekapasitashon ta parti di e transakshon na ingles pa e idioma di instrukshon.
E ministerio di OCW (enseñansa, kultura i siensia) a finansiá e trayekto di entrenamentu aki i e tim di University of St. Martin (USM) a ehekutá esaki. E trayekto a kuminsá na yanüari 2015 ku un prueba pa trese dilanti kiko e nivel di dominio di kada dosente individual ta. E sinku pruebanan ku tabatin ta: abilidat di komprenshon oral i di skucha, práktika di skirbimentu, abilidat pa lesa i ortografia & gramátika. Tur siman e dosentenan a risibí un training di parti di e dosentenan di USM dr. Rhoda Arindell (práktika di skirbimentu i ortografia & gramátika), dr. Natasha Gittens (abilidat di komprenshon oral i di skucha) i Wendie Brown (lesamentu).
E kandidatonan a risibí feedback oral i tambe por eskrito riba e tareanan i a antisipá riba e nesesidat di kada dosente individual. Anteriormente e dosentenan a hasi nan propio análisis di nan puntonan debil i fuerte pa asina indiká nan dominio di ingles. Di e 88 partisipantenan 81 a realisá nan eksámennan. E nivel nan ku por a risibí (idioma segun e kader di referensia Europeo) ta: 22% nivel B2 (B ta para pa uso di idioma independiente) , 49% riba nivel C1 i 10% riba nivel C2 (C ta para pa abilidat di e usadó). Promé ku a traha e eksámen e kandidatonan a traha un pruf eksámen di kual nan a risibí feedback riba dje.
Promé ku e eksámen na Sint Eustatius USM a firma un MOU (Memorandum of Understanding) ku e sentro ofisial di region pa e eksámennan pa Cambridge na Guadeloupe. Entre 15 ku 19 di ougùstùs 2016 e tim di eksámen di Guadeloupe a bai Sint Eustatius pa eksaminá e dosentenan. Esakinan a konsistí di un parti individual oral i por eskrito. E eksámen a bai konforme e protokòl di eksámen di Cambridge.
Na e momentu aki direktivanan di skol i tambe direktornan konhuntamente ku kordinadó Angela Dekker, apuntá di parti di OCW, ta trahando riba un proposishon pa kontinuá ku e rekapasitashon kuminsando 2017 pa dosentenan òf otro persona ku no tin e nivel nesesario aki ainda.