Luna di Mei a keda casi igual si compara esaki cu Mei 2016, na unda por mira un aumento di 11 turista ‘stay-over’. Esaki ta 80.975 bishitante en total pa nos destinacion.
Pa e asina yama year-to-date 2017, 441.455 turista a bishita nos isla, cual ta 9.9% menos cu e mesun temporada aña pasa. Si nos exclui e bishitantenan Venezolano, por mira un aumento di 8.1%, ekivalente na 410.466 bishitante.
Turismo ‘stay-over’
Aruba ta ricibi bishitantenan for di primordialmente tres diferente continente. Compara cu Mei aña pasa, pa 2017 e turismo procedente for di e continente Norte Americano a aumenta cu 9.5% y ta representa 65.4% di nos turismo den su totalidad. E mercado Mericano a aumenta cu 9.7% y e mercado Canades cu 6.2%. Pa e prome 5 lunanan di 2017, e continente aki a subi cu 9.3% si compara cu e mesun temporada durante 2016.
E mercado di continente Latino America a baha cu 26.2% durante e luna di Mei 2017 ora compara esaki cu e mesun temporada na 2016. Turismo procedente di Venezuela a baha cu 55.7% compara cu Mei aña pasa mientras tanto cu turismo di Colombia a subi cu 4.1%. E mercado di Latino America ta representa 21.5% di Aruba su turismo den su totalidad y si compara e prome 5 lunanan di 2017 cu esun di 2016, esaki a baha cu 50.5%.
Pa loke ta e mercado Europeo por nota un aumento di 1.6% compara cu e mesun luna aña pasa. Hulanda a aumenta cu 5.6%, y Reino Uni a baha cu 6.3%. E continente Europeo ta cubri 9% di turismo pa Aruba.
Pa e prome 5 lunanan, Europa a trece 8.6% turista mas pa Aruba compara cu e mesun temporada na 2016.
Turismo crucero
Durante Mei 2017, 51.756 pasaheronan crucero a bishita nos destinacion riba un total di 19 barconan crucero. Compara cu luna di Mei aña pasa, turismo crucero a crece cu 152.9 % (Mei 2016 Aruba a haya 20.462 bishitante for di 8 crucero). En total pa e prome 5 lunanan di 2017, Aruba a ricibi 170 barco crucero cual ta 2 barco menos cu e mesun temporada na 2016. No obstante e caida den e cantidad di barco, Aruba a bira un crecemento di 12.8% den pasahero crucero cu a bishita nos isla durante e prome 5 lunanan di 2017 (395.900 pasahero) compara cu e mesun temporada na 2016 (350,885).
Turismo en general pa Aruba:
Merca su prestacion ta fuerte, claro hunto cu diferente otro mercado tambe y e combinacion di esaki ta refleha tambe den resultadonan comparti door di AHATA. E bahada for di Venezuela ta impacta e volumen di e bishitantenan ‘stay-over’ pero esey sigur no ta impactando e calidad, cu ta ser midi entre otro door di entrada pa socionan den turismo y pa pais Aruba. Si compara volumen di Aruba pa cu otro destinacionnan den region di Caribe, por ripara cu nos destinacion ta wordo afecta fuertemente pa cu e situacion di Venezuela, aki mester tene na cuenta cu Aruba ta e mercado primario pa Venezuela tambe, den area di Caribe. E impacto di Venezuela ta wordo sinti na Aruba relativamente mas riba area di volumen, pero no riba aspectonan cu ta mara na ingreso pa medio di turismo. E prestacion fuerte di Merca y otro mercadonan ta refleha un entrada pa camber (RevPar) sumamente fuerte y grado di ocupacion na hotelnan sumamente fuerte.
Esey no kiermen cu Venezuela no ta importante, e pais aki ta keda un mercado cardinal, pero ora ta papia di e producto hotelero, e dependencia di Venezuela ta menos. Mester tuma nota cu awendia hopi Venezolano ta keda tambe of ta propietario di un condominium. Gran factor pakico e volume aki a cay ta debi na e bishitantenan Venezolano cu no ta e turista tradicional. Contrario, e meta di nan bishita tabata hustamente pa nan hiba hopi dollar Mericano bek pa nan pais.
Excluyendo e volume ey, ta keda e bishitante ‘normal’ di Venezuela, cu manera indica aki riba, ta scoge grandemente pa ‘otro tipo’ di acomodacion cu por ta pa gran parti ‘condominiums’. Pa aña 2016, un total di 66.6% di e bishitantenan Venezolano a keda na ‘otro tipo’ di acomodacion cu no ta hotel. Esakinan tabata inclui tambe, den e aña aki, apartamentonan barata cu tabata wordo uza pa e bishitante Venezolano ‘no tradicional’, cu awo no ta bishita mas.
Parti esencial di e strategia di A.T.A. tabata pa sigura cu entrada pa medio di turismo wordo afecta menos cu ta posibel. Pa esaki a inverti entre otro aña pasa AWG. 4 miyon adicional den mercadeo na Merca, cual a pusha resultado di ultimo kwartaal di 2016 y di e prome 5 lunanan di 2017.
Hotelnan / AHATA
Segun Aruba Hotel and Tourism Association pa e luna di Mei, e ‘Average Daily Rate’ (ADR) a aumenta cu 3.9% compara cu 2016. Esaki den cifra ta US$ 188.54 na 2016 compara cu US$ 195.95 pa 2017. E entrada pa camber disponibel, e asina yama RevPAR a aumenta cu 14.5% di US$ 142.98 na 2016 pa US$ 163.68 na 2017. E anochinan ocupa pa camber a aumenta cu 12%.