Willemstad Curacao: 8 jaar cel voor poging doodslag op karnavalsavond 2016
E hòmber L.D.H.M. (Kòrsou, 1983) a keda sentensiá djaluna mainta na un kastigu di prisòn di 8 aña pa un kaso di intento di asesinato. E kaso a tuma lugá anochi di Kima Momo 10 di febrüari 2016 na altura di Habaai den Otrobanda. Tambe M. tin ku paga un daño perhuisio di 50.000 florin na e víktima. Gobièrnu tin ku adelantá e víktima e plaka i tin ku kobra e kondenado e plaka aki bek.
Wes a haña pruebá ku M. a los 6 tiru di distansia kòrtiku riba e víktima Soleana. Debí na e heridonan Soleana awor a keda paralisá i tin ku siguí su bida den un rolstul. Wes a haña e hecho aki pruebá i kastigabel.
Den e kaso aki abogado di e sospechoso a pidi libertat (vrijspraak). Fiskal di ministerio Públiko (OM) a hasi un demanda di 12 aña di prisòn.
Wes a splika djaluna na momentu di veredikto ku e víktima ta keda pa restu di su ida den un rolstul i ku no por hasi otro sino duna e sospechoso un kastigu di prisòn pa largu tempu. “Bida di e víktima a kambia pa restu di su bida. Tur esaki debí na e sospechoso. Tipo di kasonan asina ta motibu pa shòk den nos komunidat. Tambe ta lamentabel i kuestionabel ku e sospechoso no a atmití ningun responsabilidat pa su echonan. Den mi veredikto mi a tene kuenta ku tur esaki”, di akuerdo ku wes