Con Otmar Oduber, Mike Eman y AVP a caba cu nos turismo….. den e prome dos lunanan di aña 2017 aruba a duna bonbini na 13.4% menos turista compara cu e prome dos lunanan di aña 2016!!!
Si! Bo a lesa e cos ey bon: den luna di Februari di e aña aki e cantidad di turista cu a bishita Aruba pa nan vacacion, a baha di 96.185 na aña 2016 pa 84.163 na 2017, locual kier meen un caida di nada menos cu 12.5%!
Si nos compara e prome dos lunanan di e aña coriente 2017, pues incluso luna di januari, cu e prome dos lunanan di aña 2016, nos ta weita cu e cantidad a baha di 200.257 (na 2016) te na 173.432 (na 2017), pues un caida di nada menos cu 13.4%, pa colmo den e “high season” (temporada halto) den turismo!
E caida aki a manifesta su mes principalmente den e categorianan di gruponan di hobennan di 20 pa 30, y di 30 pa 40 aña, locual ta un tendencia y desaroyo espantoso, y na mesun momento hopi alarmante y preocupante.
-Pakiko?
Wel, e contesta ta simpel! Y nos ta parti esaki den dos pida:
Obviamente ta e bishitantenan di poco mas edad ta esunnan cu ta haci cu Aruba ainda por tene cabez riba awa, y
Aruba aparentemente NO ta bastante atractivo pa bishitantenan mas hoben, net esunnan cu den futuro mester “carga” nos turismo!
DESAROYONAN HOPI PREOCUPANTE, Y UN MANEHO IGUALMENTE HOPI PREOCUPANTE.
E siguiente desaroyonan y definicion di maneho ta pa Aruba motibonan pa preocupacion, y hasta por ta mortal pa nos turismo y nos pais!
E caida di 13.4 % den e cantidad di turistanan cu ta bishita nos isla pa un estadia placentero.
E caida, net bao di e gruponan di edad mas hoben, pasobra ta nan ta e futuro turistanan y huespednan di Aruba, y NO e turistanan cu awor aki Aruba ta haya, turistanan di riba 70 aña di edad!
E averahe abao di prijs di camber di US$ 305.71 den HIGH season!
Esey ta mucho abao, y mas abao cu e prijsnan di otro destinonan den region di Caribe, cu pa colmo ta ofrece un producto turistico hopi mas luhoso.
Den e calculacionnan pa su presupuesto pa aña 2017 nos oficina di turismo ATA a considera un aumento di 1 (un!) % den e cantidad di turista cu ATA ta “verwacht” cu lo bishita nos isla (den e “begrotingsjaar” 2017.
Ta hopi dudoso cu ATA lo alcansa e meta ey pa e aña aki, pasobra awor aki caba Aruba ta kedando hopi atras den e espectativanan: djis wak e caidanan den e prome dos lunanan di e aña aki, mencioná mas ariba!
Pio ainda: con ATA ta hinca den su cabez pa bini cu un pronostico di un miserabel aumento di 1%!!
No purba esey den e mundo empresarial, den sector priva … bo dianan como director e ora ey lo ta conta di biaha! Y abo lo ta riba caya!
IMF tambe ta adverti contra e desaroyo pesimo den nos turismo, y nan ta mustra cu e resultadonan den nos turismo ta kedando hopi atras compará cu e otro destinonan Caribense, cu – contrario na Aruba – TUR ta experienciando un crecimento grandi!
No tin ningun maneho, ningun vision, ni ningun “masterplanning”, cu por permiti turismo di Aruba drenta siglo 21 exitosamente.
Mike de Meza no t’ey (na bon Hulandes: “hij maakt zich pleite”: e ta scondí), Mike Eman ta mucho ocupá na trata di defende su mes contra e escandalonan di corupcion rondó di Paul Croes y Benny Sevinger, e proyectonan fracasá di Green Corridor y hospital, e problemanan na Colegio cu Michelle Hooyboer, e rebelion di pueblo contra e dump y e gasnan quimico cu ta destrui pulmonnan di e ciudadanonan cu ta biba aya banda, djey pa bo haya un Otmar Oduber cu ta hunga e inocente santo, y ta haci manera cu no ta E ta causante di e problemanan gigantesco aki!
Manipuladornan narciso, cu un amor propio perverso, enfermizo y patalogico.
Ta sumamente tristo y lamentabel cu un set di bobonan cu no sa unda nan cara ta para (“prutsers”), narciso, egoista, vanidoso, y cu ta sinti nan mes masha cos (“zelfingenomen”), por a caba asina’ki cu e unico fuente di entrada di Aruba, esta nos turismo.
Cu mucho gusto, pero alavez cu un grado halto di envidia y celo, mi kier mustra awor tres potret di ehempelnan di e desaroyonan fantastico riba otro islanan den Caribe, realisá door di cadenanan hotelero nobo, pero cu awor ta prominente cerca vacacionistanan cu lo kier pasa nan vacacionnan na un manera hopi agradabel den un producto hotelero moderno y di e temponan aki, pues di siglo 21, cu – manera ta conoci– ta asina diferente na locual nos tin di ofrece aki riba Aruba.
E prome potret ta mustra Hotel Kimpton, cu recientemente a habri riba e isla Grand Cayman, mientras cu e di dos potret ta mustra e Sandals Royal Hotel nobo na Montego Bay, Jamaica.
Ambos acomodacion ta duna muestra di un architectura fascinante, cu kambernan grandi, cu suitenan, cada un cu nan propio especialidad, restaurantnan excelente cu nan specialidadnan, y tur luho moderno di awendia cu un turista ta spera di haya, manera servicio di butler, bañeranan rondo y grandi, spa-nan luhoso, “infinity pools” (piscinanan cu ta parce cu no tin fin, pasobra nan ta bay caba den laman; weita e di tres potret), y diferente nivelnan di servicio, manera e nivel “luxury”, e nivel “club”, y e nivel “butler.”
Bo ta comprende pakiko esakinan ta esunnan cu mayan lo sali vencedor, y pakiko Aruba lo no forma parti e grupo aki?
Y esaki ta e berguenza grandi di un mal maneho desastroso di 8 aña largo den turismo, di Otmar oduber, di Mike eman y di Mike de Meza!
Remigio A. R. Wever
Ex-director A.T.A.
Eventual reaccionnan semper ta bonbini via e-mail [email protected].