Faltando algo mas cu 1 luna pa e tan spera “Paranda di Bochincha”, Cruz Cora Aruba a cuminsa cu su ultimo preparacionnan pa 26 di November, 2016.
Esaki lo bira e prome lustro di e actividad aki, cu ta wordo organisa pa tur persona cu limitacion na Aruba. E meta di e parada di truck ta pa trece e personanan aki mas cerca di nos comunidad y laga nan sinti cu nan tin aceptacion. Mustra cu nan tambe tey! E evento ta tuma luga tur aña riba e diasabra prome cu 3 di December, cu ta Dia Internacional Pa Persona cu Limitacion.
E ruta pa Paranda di Bochincha 2016 ta: Salida 2 pm for di Cruz Cora Aruba na Dakota – Avenida Milio Croes – na ex-Fiesta Trading bay robes – crusa door di Dakota, sali na Dadelstraat subi caminda grandi y drenta Meiveld – Pavia – Hooiberg – Piedra Plat – na Bright Bakery bay man drechi y sigui riba caminda grandi. Prome cu Huchada na St. Cruz bira na man robes – T-kruising Siribana bira na man drechi – na crusada di Kadushi Largo bira na man drechi – sigui te na crusada Plaza Deto Varis bira na man drechi – na final di caya bira na man robes y yega rotonde di St. Cruz – bira na man drechi y bin full caminda di Hooiberg te crusada di Morgenster – bira na man robes y crusa Primavera – sali na Arubus – sigui pa rotonde di FCCA y pasa via Sabana Blanco yega bek Avenida Milio Croes y e final ta na Cruz Cora Aruba.
Cruz Cora ta pidi tur mayor of representante di un persona cu kier participa, pa por fabor yama nos y inscribi na tel. 582-2219 mas pronto cu ta posibel. Tambe nos ta pidi tur compania cu tin truck of esunan particular pa yama nos pa registra. Mas truck nos por conta cune, mas luga nos por ofrece nos invitadonan.