Atrobe e luna aki un grupo di persona a participa y certifica den e curso “Mastering the Art of self-hypnosis” presenta door di Aruba hypnosis Center NV.
E programa di dos dia a wordo presenta door di Eddy Oduber cu ta un instructor certifica door di e organisacion di hipnosis mas grandi na mundo. Durante e dos dia esunnan cu a participa a siña entre otro kico ta hipnosis, con hipnosis ta sinti, kico ta e diferencia entre hipnosis y self-hypnosis, kico ta berdad di e storianan cu ta bay rond ariba hipnosis, con pa haci self-hypnosis, con self-hypnosis por yuda bo logra bo metanan y mucho mas. Mescos cu esunnan cu a participa den pasado na e curso atrobe e biaha aki e reacciona tabata sumamente positivo.
Un di e participantenan a comenta: “Mi tin cu bisa honestamente cu mi a dicidi di participa na e curso aunke cu mi ta tin bastante skepticismo. E curso a permitimi pa compronde kico di berdad hipnosis ta y mi ta sumamente contento cu mi a participa. Mi ta recomenda esunnan cu kier haci cambionan den nan bida pa considera participa na e curso aki si nan haya un chens.”
Esnan cu a participa (ariba potret di robes pa drecha di ariba bin abou) ta:
Omar Tromp, Sidney Croes – a ripiti e curso – Allan E. Maduro, Eddy Oduber – Instructor -, Joseph Caton, Augustin Maduro, Gerald Franca, Jacqueline Benita Nadall, Favio Eduardo, Mireille Lacle, Susana Eduardo-Croes, Farrah Boekhoudt, Bernadette Hiroms, Mike De L’Isle, Ernand De L’Isle y Rhona Dijkhoff – no ta ariba e potret)
Ora cu menciona hipnosis hopi biaha tin diferente pensamento eroneo di kico hipnosis ta of no ta y durante di e curso cu a dura dos anochi esunnan cu a participa a comprende cu hipnosis ta un estado natural cu tur hende por siña y cu ta permiti pa haci cambionan positivo den bo bida. Hipnotismo probablemente ta mes bieu cu humanidad. Storianan bieu y pensamento eroneo di hipnotismo a wordo reemplasa pa aplicacionnan cientifico proba. Awendia hipnotismo ta wordo uza den diferente ramo incluyendo: medicina, odontologia, husticia, deporte profesional y educacion.