Diamars atardi cu e vuelo 1331 di American Airlines a sali rumbo pa Richmond, Virginia, e delegacion di Bronco cu ta pertenece na e organisacion di Pony League.
Como hefe di e delegacion Sra. Valerie Camacho Pieters hunto cu su 3 coachnan Aron Ballestrede, Severo “Chaco” Hernandez y Giovanie Pietersz. nan a tuma e desafio aki pa viaha cu 14 pelotero hunto cu nan mayornan, pa asina enfrenta Mexico Zone, Caribbean Zone y e propio USA zone durante e World Series di e Bronco league di edad 11/12. Diaranson mainta tin e congresillo pa despues sigui cu e wega inaugural na unda Aruba ta topa Mexico.
Tur dia y anochi lo tin wega pa culmina diadomingo pe wega di campeon.
Directiva di e Bronco team ta sumamente gradici na e mayornan cu pa 6 luna a bende rifa, bbq y bake sale pa asina recauda e fondonan necesario pa realisa e trip aki. Un danki grandi ta bai na tur esnan cu a contribui atendiendo e actividadnan organisa.
Awo ta keda solamente pa e muchanan aki saca cara pa nan isla Aruba, despues di a pasa trainingnan rigoroso den solo cayente pa mas di 6 luna riba Flatstone Ballpark como tambe Ripoldo Ballpark y regresa dialuna cu e titulo di campeon.