Riba diahuebs, 10 di November 2016, boluntarionan di Aruba Birdlife Conservation a entrega nan peticion sosteni cu mas cu 11.157 firma na Ministro Presidente Mike Eman como cabesante di Gobierno di Gabinete Mike Eman 2 y tambe na Parlamento di Aruba pa medio di su Presidente, Sra. Mervin Wyatt-Ras.
E meta di Aruba Birdlife Conservation tabata pa recoge 5.000 firma, pero e sosten pa rescata naturalesa na Aruba ta asina grandi cu a pasa e cantidad di 5.000 firmanan dentro di 72 ora despues cu a cuminsa cu e accion aki. Na e momento di entrega di e peticion na Ministro Presidente y Presidente di Parlamento ya a surpasa 11.000 firma caba y ainda firmanan ta drentando.
E peticion ta un yamada na Gobierno di Aruba, Parlamento di Aruba y Gobernador di Aruba pa entre otro pone un paro na e destruccion di areanan di naturalesa na Aruba.
Ta asina cu riba 6 di Februari 2013, tur bintiun miembro di Parlamento di Aruba, e institucion mas alto di nos sistema democratico, a vota unanimamente na fabor pa proteha 16 area y pa laga declara nan como areanan natural di importancia nacional y pa incorpora nan den Parke Nacional Arikok.
Te awor gobierno no a sa di cumpli di implementa e decision di Parlamento, pa proteha e 16 areanan importante aki.
Mas ainda, en bes di proteha e areanan aki, gobierno a hasta duna permiso y ta den fase pa bay sigui duna mas permiso di construction na entre otro e Bubali Wetland Area y tambe na e area di mangelnan na Savaneta dor di cual e destruccion ta y lo sigui tuma lugar di e areanan di naturalesa hopi importante aki pa Aruba.
Aruba Birdlife Conservation ta haci un suplica grandi na Ministro Presidente Mike Eman y Presidente di Parlamento Mervin Wyatt-Ras, pa bolter e inaccion persistente di gobierno y otorgamento di permiso di construccion contra e boluntad di e representantenan elegi di nos parlamento, y dor di actua positivamente mas liher cu ta posibel preveni cu lo sigui degrada, fragmenta y destrui habitatnan importante na diferente locacion di nos isla.
Tambe ta haci un suplica grandi na e dirigentenan pa no kibra e Plan di Desaroyo Espacial (R.O.P of Ruimtelijke Ontwikkelings Plan) cu intencion di remove e estado protectivo di diferente zonanan berde, humedalnan (wetlands) y otro areanan di importancia pa nos naturalesa pa facilita mas construccion y desaroyo di hotel y condominio.
E representatenan di Aruba Birdlife Conservation a informa Ministro Presidente Eman y Presidente di Parlamento Wyatt-Ras, cu e mas di 11 mil firmantenan di e peticion aki ta haci un yamada na nan pa por fabor pone un paro na e destruccion cu ta tumando lugar na e Bubali Wetland Area y tambe locual tin planea na e area di mangelnan na Savaneta.
E firmantenan tambe ta haci un suplica pa implementa, sigura y enforsa accionan regulatorio apropia pa gobierno, conduciendo na proteccion completo di e diesseis areanan aki, ya reconoci pa Parlamento di Aruba.
E peticion ta encera e incorporacion di e 16 areanan aki den Parke Nacional Arikok manera a keda determina pa e institucion mas halto di nos sistema democratico, esta Parlamento di Aruba.
Por ultimo, e peticion ta encera pa no remove e estado protectivo di ningun di e zonanan berde na Aruba manera ta designa den e Plan di Desaroyo Espacial (R.O.P of Ruimtelijke Ontwikkelings Plan).
E representantenan di Aruba Birdlife Conservation tambe a haci un suplica na Ministro Presidente Eman y Presidente di Parlamento, Sra. Wyatt Ras pa formalisa e lei nobo di medio ambiente y a listanan di flora y fauna cu mester wordo proteha na Aruba.
E suplica di Aruba Birdlife Conservation a haci na Ministro Presidente Mike Eman ta pa haci su maximo esfuerzo pa yuda regla e proteccion di e 16 areanan aki y pa encorporanan den Parke Nacional Arikok prome cu fin di e aňa aki 2016.
Aruba Birdlife Conservation ta informa cu e reunionan cu Ministro Presidente y Presidente di Parlamento a bay positivo y cu nan a sali di e reunionnan aki cu optimismo.
E reunion cu Gobernador ta planea pa e siman venidero.
Aruba Birdlife Conservation kier a gradici tur esnan cu a yuda na un of otro manera pa e peticion aki por a bira asina un exito grandi, muy emparticular e mas cu 11 mil firmantenan.
Portret:
Ribe a portret e momento cu boluntarionan di Aruba Birdlife Conservation a entrega e peticion na Presidente di Parlamento di Aruba. Cuminsando di banda robes, Damilice Mansur, Greg Peterson, Presidente di Parlamento Sra. Wyatt-Ras, Stephany Wever y Peter Sprockel.